Фонд «Краіна для Жыцця»

Каманда Офіса павіншавала дзяцей палітвязняў з Новым Годам і Калядамі

Прадстаўнікі Офіса далучыліся да ўдзелу ў штогадовай «Каляднай пошце» – ініцыятыве, якая здзяйсняе мары дзяцей палітвязняў і кладзе падарункі пад ялінку.

Чаму важна далучацца да такіх акцыяў?

Аляксандр Дабравольскі:

«Сёння тысячы нашых грамадзянаў знаходзяцца ў турмах па палітычных матывах. Шмат у каго з іх ёсць дзеці, якіх таксама караюць – забіраюць маму і тату. Гэтым дзецям, як і ўсім дзецям, патрэбныя любоў і клопат. І мы можам дапамагчы: перадаць ім кропельку нашай любові, далучыўшыся да дабрачыннай акцыі. Зычу ўсім дзеткам палітзняволеных у Новым годзе сустрэць на волі і абняць бацькоў. І каб больш ніколі ў Беларусі нікому не было дазволена рабіць дзяцей ахвярамі некантраляваных палітычных амбіцыяў».

Станіслава Гліннік:

«Пошта Дзеда Мароза – яшчэ адна цудоўная праява беларускай салідарнасці. Дзеці не павінны жыць у жаху, які стварае рэжым, пад пагрозамі, якія вісяць над іх сем'ямі. На Новы год кожны з нас жадае цяпла і чараўніцтва. Хай кожная сям'я, якая прайшла праз цяжкія выпрабаванні, пераадолее цяжкасці і адновіць душэўны спакой, а кожнае дзіцё будзе цешыцца вакацыям і падарункам, а не чакаць маму і тату з турмы».

Партнёры акцыі 2024:
– Дабрачынны фонд «Краіна для жыцця»;
– Праваабарончая ініцыятыва dissidentby;
– Аssociation of Belarusians in America;
– Belarusische Gemeinschaft RAZAM;
– Народныя Амбасады Беларусі.

«Знайсці найлепшыя рашэнні ў эміграцыі – і ў будучыні прывезці гэты досвед дадому»

Прадстаўніца па сацыяльнай палітыцы Аб’яднанага Пераходнага Кабінета Вольга Зазулінская – пра ініцыятыву «Крэатыўная прастора ARTel», якая развіваецца ў Польшчы і мае на мэце падтрымку беларусак у эміграцыі:

«Сацыяльныя праекты ў эміграцыі – гэта не толькі падтрымка тут і цяпер, але і фундамент для будучыні Беларусі. У тым ліку ініцыятыва ″Крэатыўная прастора ARTel″, створаная ў Варшаве беларускай Аленай, якая сутыкнулася з праблемай прафесійнай і сацыяльнай неўладкаванасці жанчын на чужыне і сама прайшла праз складанасці адаптацыі.

Мэта праекта – падтрымка беларускіх уцякачак у Польшчы праз стварэнне супольнасці, арт-тэрапію, заняткі рукадзеллем і дапамогу ў прафесійным развіцці. Такія ініцыятывы вучаць вырашаць праблемы і будаваць гарызантальныя сувязі, якія ў выніку прывядуць нас да сапраўды сацыяльна арыентаванага грамадства.

Усё пачыналася з невялікага гуртка рукадзелля на кватэрах і з часам перарасло ў арганізаваны праект. Яго ўдзельніцы ўжо атрымалі стабільнае месца для сустрэч і творчай працы – за што я хачу падзякаваць службе «Хуткая гуманітарная дапамога» – і ў будучыні плануюць маштабіравацца. ″Крэатыўная прастора ARTel″ заснаваная на прынцыпах сацыяльнага прадпрымальніцтва і ў тым ліку стварае працоўныя месцы.

Асаблівая ўвага надаецца падтрымцы жанчын старэйшага ўзросту і пенсіянерак, якія часта сутыкаюцца з асаблівымі цяжкасцямі ў працаўладкаванні.

Зараз у нас ёсць час і магчымасці эксперыментаваць, запускаць праекты за межамі краіны, каб знайсці найлепшыя рашэнні ў эміграцыі – і ў будучыні прывезці гэты досвед дадому. Вялікі дзякуй усім неабыякавым беларусам і беларускам, якія рухаюць свае ініцыятывы наперад. Вы ствараеце будучыню!»

@CabinetBelarus