Low-Budget Repairs сімулятар кепскага рамонту, як можна нават зразумець з назвы. Вельмі кепскага рамонту. Праўда яе ўжо паспелі перайменаваць ў Majster Symulator.

Фармальна вы становіцеся ўладальнікам маленькага бізнесу ў Польшчы 1990-х і займаецеся бюджэтным рамонтам. Усё ў фарбе, праёмы ў вокнах закладваюцца цэглай, але затое можна папіваць піўцо! Не праца - а мара.

Калі верыць апісанню: у гульні трэба будзе рамантаваць розныя памяшканні і непаладкі - ратаваць затопленую ванную ці праводзіць поўную рэнавацыю ў кватэры, хадзіць у будаўнічую краму, зразумела максімальна эканоміць, бо грошы ад заказчыка ўжо належаць вам, разводзіць фарбу, ляпіць плітку без узроўню, выкідаць канапы праз акно і гэтак далей.

Адзначу толькі, што большая частка відэа, якое завірусілася ў інтэрнэце, выглядае як пастаноўка і імаверна далёка не ўсё мы ўбачым у фінальным геймплэй.

Акрамя сімулятара рамонту каманда таксама займаецца сімулятарам аднаўлення гадзіннікаў Watch Restoration, але там ужо ўсё сур'ёзна, без камедыйнага эфекту.

Majster Symulator некалі выйдзе на ПК. Старонка Steam у Беларусі даступна.