Турбуешся за буслоў, якія не адляцелі?

Звычайна ў канцы жніўня белыя і чорныя буслы ўжо пакідаюць Беларусь. Застаецца толькі невялікая частка белых буслоў – позніх маладых, хворых альбо прыручаных чалавекам.

❓ Ці трэба ім дапамагаць? Залежыць ад абставін:

1️⃣ Малады бусел, які прыйшоў у вёску – слабы ў палёце. Маладая птушка позняй гадоўлі, якая яшчэ дрэнна лётае, але можа пералятаць на значныя адлегласці. Такіх маладых буслоў лепей перасунуць на луг, дзе ў іх ёсць магчымасць паляваць і спазнаваць жыццё самастойна. За імі лепей назіраць і толькі пры неабходнасці адлавіць, каб перадаць у прытулак (Гродзенскі заапарк, прыватная прыродаахоўная ўстанова «Ахова прыроды» ў Асіповіцкім раёне і Цэнтр дапамогі дзікім жывёлам «Сірын» пад Мінскам. Кантакты можна знайсці ў інтэрнэце).

2️⃣ Птушка ў цэнтры горада, якую падкармілі людзі каля крамы. Птушка, якую, верагодна, вырасцілі людзі і навучылі браць ежу з рук. Карміць такога бусла не трэба. Калі яго падкормліваць, ён будзе заставацца на месцы і не будзе вучыцца паляваць, не кажучы ўжо пра тое, каб пачаць перамяшчацца і мігрыраваць. Гэткія выпадкі часта заканчваюцца наездам машыны або няшчасным выпадкам, калі бусел цэліць у вока чалавеку (напрыклад, дзіцяці), які падыходзіць занадта блізка. Калі кармленне спыніць, гэта прымусіць бусла самастойна шукаць ежу і рухацца. Пакуль яшчэ цёпла, у бусла ёсць шанец вырушыць да месцаў зімоўкі.

3️⃣ Траўмаванага бусла трэба паказаць ветэрынару. Глядзі памятку па дапамозе параненай птушцы.

З прыродаахоўнай пазіцыі беламу буслу як віду зараз нічога не пагражае. Штогадовая гібель сотняў гэтых птушак ад натуральных прычын не можа неяк пагоршыць становішча віду. З прыродаахоўнай пазіцыі дапамагаць трэба галоўным чынам птушкам, якія пацярпелі праз чалавека, бо ў такім выпадку можа загінуць і моцны, здаровы бусел. З зоаабарончага пункту гледжання, вядома, шкада кожную асобную птушку.

Крыніца: Grupa EkoLogiczna, Facebook.

📷 Дзякуем за фота Анастасіі Скачэк, @ptushkafota.