Дзікая прырода побач

✨ Незабыўны падарунак на Новы год!

Размалёўкі-энцыклапедыі ад арнітолагаў для ўсіх аматараў птушак – дзяцей і дарослых. Яны дапамогуць даведацца больш аб птушках Беларусі, вывучыць назвы птушак на рускай і беларускай мове, і адпачыць за прыемным заняткам.

🐦 Усе птушкі ў размалёўках тыя, якіх вы з дзіцём рэальна можаце сустрэць у нашай краіне. Разам вы пазнаёміцеся з 33 відамі нашых птушак, многіх з якіх вы, верагодна, і не ведалі.

🔹 Шчыльная, прыемная навобмацак папера.
🔹 Вялікія прыгожыя, натуралістычныя і някітчавыя малюнкі.
🔹 Цікавы факт пра птушку на кожнай старонцы.

🎁 Такія ілюстраваныя міні-энцыклапедыі – цудоўны падарунак для калег, родзічаў, суседзяў і іх дзетак.

Як можна інтэрактыўна выкарыстоўваць размалёўкі:

✔️ Прыдумляць творчыя заданні: напрыклад, папрасіць дзіця знайсці і размаляваць тую птушку, якая… (і даць адзін факт пра гэтую птушку).
✔️ Ускладняць заданні для старэйшых дзяцей: паглядзець каляровую карцінку, потым закрыць і па памяці размаляваць другую. А потым паглядзець, што ня так.
✔️ Можна падпісваць дату, калі ўбачылі нейкую птушку ў прыродзе, коратка апісаць, як і дзе гэта было – атрымаецца такі дзённік ці альбом натураліста.

📚 Размалёўкі ідуць у камплекце з 3 штук: птушкі ля кармушкі, драпежныя і вадаплаўныя птушкі. Кошт камплекту – 30 рублёў, для ўдзельнікаў Дзікага клуба – 24 рублі.

Заказвай свой камплект размалёвак!

Прыбытак ад размалёвак ідзе на ахову дзікай прыроды Беларусі. ❤️

Дзякуем за фота Ніне Каралевіч.

Яны існуюць! Angry birds у рэальным жыцці. 😅

📷 Дзякуем за фота звычайных чачотак Паўлу Сацуту.

Маеш забаўныя кадры птушак і звяроў? Дзяліся імі ў Тэлеграм-чаце "Птушкі з фотастужкі" @ptushkafota. Найлепшае апублікуем у нашых сацсетках.

#птушкажарт

Якія колеры! 😍

У пахмурнае надвор’е грак (грач) выглядае проста як чорная птушка. Але ўсё змяняецца, калі свеціць сонейка. Толькі паглядзі, як прыгожа пераліваецца на сонцы яго апярэнне!

Удзельнікі чату “Ціў-ціў” прыдумалі сваю назву такім пералівам – бензінавы колер. 😅

Не маеш з кім пагаманіць пра птушак? Далучайся ў Тэлеграм-чат “Ціў-ціў” @ptushkachat. Тут цэняць гумар, дапамагаюць вызначаць птушак, даюць карысныя парады.

📷 Дзякуем за фота Валеру Пясецкаму.

А дзе ж тыя ракі зімуюць?

🦀 У спячку ракі не ўпадаюць, а зімуюць у тых жа вадаёмах, дзе жывуць летам, толькі перабіраюцца на глыбіню – там вада цяплейшая. Большасць часу яны праводзяць у сваіх сховішчах, дзе дрэмлюць да 20 гадзін у суткі, а ў астатні час перасоўваюцца па дне і палююць.

Але гэта тычыцца толькі самцоў. У самак ракаў узімку больш актыўнае жыццё.

#Дзікіфакт: ракі спароўваюцца позняй восенню – у кастрычніку-лістападзе. Пасля гэтага самкі выношваюць ікру на сваіх брушках усю зіму, да канца вясны – пачатку лета. Яны клапатліва даглядаюць ікрынкі, абмываюць іх вадой і ачышчаюць ад глею.

📷 Дзякуем за фота вузкапальцага рака Алёне Ціхановіч.

🦆 Падтрымай птушку 2024 года: прагаласуй за лепшую паштовую марку!

Белпошта аб’явіла конкурс на найлепшую марку 2024 года. 

💌 Галасуй за малы ліст з крумкачовымі  (№ 1568-1571) да 23 снежня па спасылцы https://www.belpost.by/philately/contest

Вынікі конкурсу будуць апублікаваны 26 снежня на сайце Белпошты.

Рыбалоўнае смецце не толькі непрыгожа выглядае ў прыродзе, але і небяспечнае для жывёл.

🎣 Раней рыбалоўныя снасці каштавалі дорага і рыбаловы клапаціліся аб захаванні каштоўнай маёмасці. Цяпер паплаўкі, скруткі лёскі, свінцовыя грузілы, кручкі, блешні не праблема сустрэць на беразе любога вадаёма побач з бытавым смеццем, якое пакідаюць тыя ж людзі. Таму звяртаемся не да рыбаловаў, а да чытачоў нашага канала.

🦆 Птушкі і птушаняты блытаюцца ў лёсцы, чапляюцца за кручкі, глытаюць блешні. Як правіла, такія сустрэчы канчаюцца смерцю птушак. Гэта смецце амаль вечнае: метал і пластык вытрымліваюць дзесяцігоддзі.

Снегу пакуль няма, калі ты сустракаеш на вадаёмах пакінутае іншымі смецце, асабліва рыбалоўнае – калі ласка, спалі ці данясі яго да сметніцы. 🙌

📷 Фота Аляксандра Вінчэўскага: смецце, знойдзенае на беразе побач з мінскай аляпкай.

Пераможцы фотаконкурсу “Дзікая прырода Беларусі 2024” ад Smartpress атрымаюць крутыя дадатковыя прызы ад кампаніі Xiaomi

🏆 На мінулым тыдні ў фотаконкурсе “Дзікая прырода Беларусі 2024” з’явілася яшчэ адна намінацыя – Прыз сімпатый гледачоў. Але гэта яшчэ не ўсе добрыя навіны для ўдзельнікаў конкурсу.

Акрамя галоўнага прыза – аўтарскай бронзавай статуэткі “Заяц” скульптара Канстанціна Селіханава – пераможцы атрымаюць яшчэ дадатковы. Ды яшчэ які!

👉 Што за прыз, чытай тут

Фота: @Smartpress

Калі ты ідэальны і ведаеш аб гэтым 😅

📷 Дзякуем за цудоўнае фота качкі-крыжанкі Іне Шкурко.

#птушкажарт

Не кармі вадаплаўных птушак хлебам

Хлеб для вадаплаўных птушак – нездаровая ежа. Гэта тое ж самае, калі б чалавек еў толькі фаст-фуд. Стрававальная сістэма птушак для такой ежы не прыстасаваная. Хлеб дае адчуванне сытасці, але не спрыяе нармальнай жыццядзейнасці птушкі, і можа прывесці да залішняй вагі, разладжання страўніка і іншых праблемаў.

🦠 А некаторыя людзі спецыяльна нясуць з дому стары цвілы хлеб, які чамусьці выкінуць шкада, мяркуючы, што робяць добрую справу для птушак. Ні ў якім разе так рабіць нельга! Цвілы хлеб можа выклікаць аспергілёз, смяротнае захворванне лёгкіх, якое можа вынішчыць усю чараду качак альбо іншых вадаплаўных птушак.

🦆 Дзікія качкі і іншыя вадаплаўныя птушкі могуць пражыць больш доўгае і здаровае жыццё, калі будуць харчавацца натуральнай ежай – воднымі раслінамі, насеннем і бесхрыбетнымі, а не тым, што кідаюць ім людзі.

Падкормліваць вадаплаўных варта толькі пры моцных маразах, калі некалькі дзён трымаецца тэмпература -15 і ніжэй, а птушкі не зляцелі. Можна пачаставаць іх аўсянымі шматкамі, насыпаць уздоўж берага каля вады або лепш на мелкаводдзі ячменю або пшаніцы.

✅ Падзяліся гэтым допісам, каб больш людзей зразумела, што карміць вадаплаўных птушак хлебам нельга. Лепш проста назіраць і любавацца імі.

Ілюстрацыя Paulina Punki Michalska / punkidrawsstuff са старонкі Ośrodek Jelonki, Facebook.

Меандры – выгібы рэчышча ракі – гэта не толькі прыродная прыгажосць.

💧 Меандры запавольваюць рух вады і павялічваюць працягласць ракі. Па рацэ, якую пераўтварылі ў канал, вада сплывае хутка, не затрымліваючыся, а па звілістым рэчышчы вада цячэ марудна – гэта дапамагае зменшыць негатыўныя наступствы палаводдзяў, пікі паводак, іх інтэнсіўнасць і ўрон ад іх.

Калі аднавіць меандры рэк, якія былі ператвораны ў каналы, можна павялічыць воднасць рэгіёну, прадухіліць засухі, палепшыць якасць вады, захаваць біяразнастайнасць. 💙

Дзікія рэкі могуць дапамагчы змякчыць наступствы змены клімату, калі захоўваць іх у натуральным стане.

📷 Выява з сайта aquaportail.com

#дзікіярэкі #свабодныярэкі #freerivers #wildrivers

Вітаем, шаноўныя сябры!

З радасцю паведамляем, што календары з птушкамі ўжо ў нашым офісе, і на гэтым тыдні мы разашлем іх усім пакупнікам.

А тых, хто хацеў забраць свой заказ самавывазам, чакаем у госці па адрасе: вул. Парніковая, д. 11, пам. 4.

Калі ласка, перад тым, як ехаць да нас, папярэдне патэлефануйце па нумару +375447046996

Дзякуем за заказ календара і вашу цярплівасць! ❤️

Проста неверагодны момант злавіў у аб'ектыў птушкар Алег Аляксевіч! 🤩

Прапануем табе прыдумаць смешны подпіс да фота. 😁

Пішы свае варыянты ў каментарах!

📷 На фота зялёны дзяцел.

Калі ты таксама хочаш дзяліцца з намі сваімі фотаздымкамі птушак, далучайся да чату “Птушкі з фотастужкі” @ptushkafota

#птушкажарт

🐦 Шэрая варона, каўка (галка), грак (грач), сарока, крумкач (ворон), сойка – гэта прадстаўнікі сямейства крумкачовыя, адны з найразумнейшых птушак у свеце.

Яны маюць цягу да авантурызму, любяць пазабаўляцца і могуць пастаяць за сябе.

Пра дзіўных крумкачовых у рамках нашага са @Smartpress праекта “Дзікая прырода Беларусі” распавядае арнітолаг Сямён Левы. Чытай інтэрв'ю тут.

📷 На фота шэрая варона – птушка 2024 года, аўтар Валер Пясецкі.

Што за звер такі?

🌲 Лясная куніца насяляе лісцевыя і хваёвыя лясы па ўсёй тэрыторыі Беларусі. Але ўбачыць яе ў дзікай прыродзе – вялікая ўдача. Звер паводзіцца асцярожна і пазбягае сустрэч з чалавекам.

На зіму лясныя куніцы ў спячку не кладуцца, а вядуць актыўны лад жыцця круглы год.

#Дзікіфакт: Цяжарнасць лясных куніц цягнецца 236-274 сутак – амаль як у чалавека. Спароўваюцца звяркі ў ліпені-жніўні, потым цяжарнасць пераходзіць у латэнтную стадыю і аднаўляецца ў канцы зімы – пачатку вясны. Патомства нараджаецца ў лютым-сакавіку і расце ўжо ў цёплы час года. Так прырода паклапацілася аб тым, каб бездапаможныя і сляпыя ад нараджэння шчаняты куніц, якія важаць усяго 30 грамаў, мелі больш шансаў выжыць.

Падзяліся гэтым допісам з сябрамі, каб больш людзей ведалі цікавосткі з жыцця роднай прыроды. 🤗

📷 Дзякуем за фота Глебу Сініцкаму, чат “Птушкі з фотастужкі” @ptushkafota.

Глядзі, хто заляцеў у Беларусь! 🤩

24 лістапада ў Верхнядзвінскім раёне Віцебскай вобласці птушкары Мацвей Іхненка і Дзмітрый Чудзінаў заўважылі саву-бярозаўку. 🦉

У Беларусі сава-бярозаўка – вельмі рэдкая госця. Яна гняздуецца ў таежнай зоне Еўропы і Азіі. Звычайна зімуе ў межах гнездавога арэала, але бывае, качуе на поўдзень. У нас яе рэгістравалі ўсяго каля дзясятка разоў. Дзве апошнія рэгістрацыі былі ў 2022 годзе.

Пра сустрэчу з птушкай расказвае Дзмітрый Чудзінаў:

“Мы з сябрам гасцілі на сядзібе “Заімка Лесуна”. Галоўнай мэтай нашага падарожжа былі касматаногі сыч (мохноногий сыч) і жоўтагаловы дзяцел (трёхпалый дятел), але ўдача абыходзіла нас бокам.

Каб не марнаваць час, вырашылі пакатацца па наваколлі. Бліжэй да канца паездкі мы заўважылі драпежную птушку, якая сядзела на дрэве пасярод поля. Мы не маглі толкам разглядзець птушку ў бінокль, галавы не было відаць, і мы меркавалі, што гэта шуляк-карагольчык (ястреб-перепелятник), хаця выглядаў ён дзіўнавата.

Зрабілі некалькі здымкаў – і сумневы ў тым, што гэта шуляк-карагольчык поўнасцю зніклі. Вырашылі прагнаць фота праз нейрасетку. Рэзультат ашаламіў – сава-бярозаўка! Арнітолагі Наталля Карліонава і Дзмітрый Шамовіч пацвердзілі, што гэта яна.

Далей было ўсеагульнае трыумфаванне, шквал паведамленняў з просьбамі выдаць каардынаты знаходкі, усведамленне таго, што мы сталі часткай невялікай групы шчасліўчыкаў, якія сустрэлі гэтую рэдкую госцю.”

🦉 Сава-бярозаўка памерам крыху большая за голуба. Руская назва (ястребиная сова) звязаная з тым, што гэтая сава нагадвае шуляка-карагольчыка (ястреба-перепелятника) афарбоўкай нізу цела, крылаў і хваста. У палёце сава-бярозаўка таксама падобная да шуляка: пасля серыі ўзмахаў яна плануе на распасцёртых крылах. Апроч гэтага, яна часта сядзіць на вяршыні дрэва ці іншай прысады, нахіліўшыся наперад, як шуляк, а не сядзіць у тыповай савінай позе “слупам”.

Уважліва назірай за дзікай прыродай, звяртай увагу на незвычайнае! Дзяліся сваімі назіраннямі ў Тэлеграм-чаце "Ціў-ціў " t.me/ptushkachat.

📷 Фота Мацвея Іхненка і Дзмітрыя Чудзінава

Знайшлі кажана ўзімку – куды званіць?

Па традыцыі з пачаткам першых лістападаўскіх маразоў “Кажанаполіс” адчыняе ўжо восьмы сезон і прымае кажаноў.

🦇 “Кажанаполіс” – цэнтр рэабілітацыі рукакрылых у Мінску, дзе кажанам, якія трапілі ў бяду, дапамагаюць перазімаваць.

Узімку рукакрылыя знаходзяцца ў стане гібернацыі, для якой выбіраюць прахалодныя, вільготныя і зацішныя месцы. Звычайна гэта пячоры і падобныя да іх натуральныя сховішчы. Але паколькі ў Беларусі дэфіцыт такога “жытла”, кажаны зімуюць у будынках чалавека. Калі знайсці і проста выпусціць знойдзеную жывёлку на свабоду ў зімовы час, яе чакае смерць ад холаду.

Памятай: кажаны – вельмі карысныя і неабароненыя жывёлы, 8 відаў кажаноў знаходзяцца ў Чырвонай кнізе Беларусі.

Таму, калі табе ў зімовы час трапіць кажан, неадкладна тэлефануй у “Кажанаполіс” +375292139257 (+ Viber, WhatsApp, Telegram). Звярка дагледзяць і ўладкуюць на камфортную зімоўку, а вясной выпусцяць зноў у прыроду. 🤗

📷 Фота Аляксея Шпака.

❄️ У Беларусі ўжо месцамі выпаў снег – самы час, каб павесіць кармушку і дапамагчы птушкам!

Памятай, кармушка павінна быць:

🔸 герметычнай, каб насенне заставалася сухім
🔸 пажадана вялікага аб’ёму
🔸 такой, каб было лёгка трымаць яе ў чысціні
🔸 каб маглі адначасова карміцца некалькі птушак
🔸 нязручнай для шызых галубоў
🔸 добра, калі пры яе стварэнні адбываецца рэсайклінг матэрыялаў
🔸 птушкі не павінны мець магчымасці спаражняцца ў корм
🔸 у птушак павінен заставацца добры агляд на выпадак драпежніка.

Ты можаш нават зрабіць кармушку сваімі рукамі з падручных матэрыялаў.

Кармушкі бываюць розныя, і ў кожнай ёсць плюсы і мінусы, чытай пра іх тут.

🐦 Можаш павесіць у сваім двары некалькі кармушак розных тыпаў – так ты прыцягнеш больш розных відаў птушак. Ты заўважыш, што розныя віды аддаюць перавагу розным кармушкам. Закупайся семкамі сланечніку!

❓А ў цябе ўжо вісіць кармушка?

📷 Фота 1, 2 – аўтар Валер Пясецкі; фота 3 – з чату “Птушкі з фотастужкі” @ptushkafota; фота 4 – аўтар my_sweety_birds.