Słuchać hadko! (былы Rerum Novarum)

У суботу аб 11:00 беларускага часу ў Ватыкане адбудзецца цырымонія пахавання Папы Францішка (Хорхэ Мар'ё Бэргольё), які пайшоў з жыцця 21 красавіка пасля працяглай хваробы. "Белсат" пакажа трансляцыю з месца падзеяў.

Цырымонія развітання пачнецца на плошчы перад базілікаю Святога Пятра памінальнаю месай, прысвечанай Папу Францішку. Пахавальную літургію ўзначаліць дэкан Калегіі кардыналаў Джаванні Батыста Рэ. Пасля адбудуцца абрады апошняга развітання, і труну Папы Рымскага перанясуць у базіліку Санта-Марыя-Маджорэ, дзе яго і пахаваюць.

Напрыканцы свайго апошняга паслання гораду і свету напярэдадні свайго спачыну Папа Францішак адзначыў, што ў гэты Юбілейны год Вялікдзень таксама можа быць добрай нагодай для вызвалення ваеннапалонных і палітычных вязняў.

«Якую вялікую прагу смерці, забойства мы назіраем кожны дзень», — сказаў Папа, перш чым памаліцца: «Няхай прынцып чалавечнасці заўсёды будзе адметнай рысай нашых штодзённых дзеянняў».

Нарэшце, Папа падкрэсліў, што ў гэты Вялікдзень Уваскрослы Хрыстус «напаўняе нас упэўненасцю, што і мы пакліканы да ўдзелу ў жыцці, якое не ведае канца, калі больш не будзе чуваць грукату зброі і грукату смерці».

Брусельскі Цэнтр Вілфрыда Мартэнса учора падзяліўся зборнікам матэрыялаў пад назвай “Хрысціянская дэмакратыя, кансерватызм і выклік крайнасцяў”.

У кнізе, як заяўляецца, разглядаюцца палітычныя праблемы, з якімі сутыкаюцца правацэнтрысты ў Еўропе, праз рост праварадыкальных партыяў і іх уплыве на дэмакратыю, еўрапейскую інтэграцыю і трансатлантычныя сувязі.

Зборнік можна спампаваць па спасылцы. Кнігу пакуль не чыталі. Але вітаем спробы прааналізаваць хрысціянска-дэмакратычны падыход да сучасных праблемаў і выклікаў.

Сёння, падчас урачыстай святой Імшы, не вылазіла з галавы адно параўнанне. Параўнанне падзеяў біблійных з падзеямі з сучаснай беларускай гісторыі.

Уваход Хрыста ў Ерузалем - гэта дэ-факта палітычная маніфестацыя, калі месцічы віталі Таго, каго лічылі сваім новым каралём. Паказвалі, што не хочуць жыць так, як жылі раней. Што хочуць новага жыцця.

Паводле свайго зместу гэта вельмі моцна нагадвае марш 16 жніўня 2020 года, калі беларусы спачатку нясмела, але з кожным крокам, з кожным позіркам, з кожным незнаёмым, але такім блізкім тварам сотнямі тысяч выходзілі на вуліцы сваіх гарадоў і вёсак.

І як ерузалемцы дзве тысячы гадоў таму махалі галінкамі пальмаў, гэтак і мы з вамі нацыянальнымі сцягамі пафарбавалі вуліцы Менску, Горадні, Берасця і іншых у бел-чырвона-белыя колеры. Колеры Хрыста.

Але як і тады, гэтак і цяпер радасць і эйфарыя не былі доўгімі. Хрыста затрымалі, збілі і ўкрыжавалі. Ягоныя вучні мусілі ўцякаць, выракацца і хавацца, іх лавілі і забівалі. Шмат хто разгубіўся, зняверыўся, расчараваўся. На жаль, тое самае сталася і ў Беларусі.

Але, як і апосталы і іншыя вучні Хрыста, мы мусім і надалей знаходзіць у сабе сілы, веру і моц, каб зноў і зноў не спыняцца, не здавацца, не забывацца. Каб урэшце і ў нас было сваё ўваскрасенне.

Сёння дзень Святога Даната, аднаго з 13 паўночнаафрыканскіх мучанікаў.

З гэтай нагоды нагадваем, што свой данат можна накіраваць і нам 😘