Paville | Pavilenščyna

20 красавіка 1900 году ў Казаноўшчыне нарадзіўся Адольф Клімовіч — беларускі грамадзка-палітычны дзяяч.

Скончыў Віленскую беларускую гімназію.

У Празе кіраваў аддзелам міжнародных зносінаў Аб’яднаньня беларускіх студэнцкіх арганізацыяў.

Па вяртаньні на Бацькаўшчыну актыўна ўдзельнічаў у беларускім руху.

У 1929 годзе абраны віцэстаршынём Беларускага Інстытуту Гаспадаркі і Культуры.

У 1932—1939 рэдагаваў часопіс «Самапомач».

Дзяяч Беларускае хрысьціянскае дэмакратыі, у 1939—1940 удзельнічаў у выданьні газэты «Беларуская крыніца».

Выкладаў у Віленскай беларускай настаўніцкай сэмінарыі.

У 1952 — арыштаваны МГБ БССР. Прысуджаны да вышэйшай меры пакараньня, у красавіку 1953 расстрэл заменены 25 гадамі зьняволеньня.

Вярнуўся зь лягеру ў Вільню ў 1956 годзе.

Склаў біяграфічны слоўнік беларускіх культурных і палітычных дзеячоў.

#нашвядомызямляк
#астравеччына

Атмасферныя фота з глыбінь інтэрнэту.

#смаргоншчына

У 1881 годзе ў Есьманаўцах нарадзіўся Іван Біч — удзельнік Грамадзянскае вайны ў Расіі.

Удзельнік рэвалюцыі 1905—1907. Хаваючыся ад паліцыі, зьехаў у Сыбір.

Пасьля Кастрычніцкае рэвалюцыі сябра Краснаярскага губрэўкаму.

Для барацьбы з Калчаком у сяло Шыткіна Канскага павету арганізаваў партызанскі атрад (больш за 1000 партызан, сярод якіх былі перасяленцы з беларускіх губэрняў), у складзе якога ўдзельнічаў у паўстаньні, якое ахапіла 13 воласьцяў.

Падчас баявое апэрацыі ў верасьні 1919 году трапіў у палон і пасьля катаваньняў павешаны.

На здымку — сям'я Івана Біча ды ён сам з правага боку.

#валожыншчына
#нашвядомызямляк

Падчас навучаньня ў Маладэчне Міхась Кудзелька спатыкае людзей, якія разумеюць, што ён адораны паэт.

Адным зь іх быў студэнт Петрачкоў (імя невядомае), які рыхтаваў Міхася да паступленьня ў сэмінарыю.

Гэты Петрачкоў, аднойчы пачуўшы вершы Кудзелькі, зьдзівіўся ягонаму таленту ды бяз грошаў рыхтаваў яго да паступленьня ў Маладэчну.

Адразу пачуўшы гэтае прозьвішча, я ўзгадаў Міхалку Петрукова — беларускага пісьменьніка й публіцыста, што паходзіў зь Івянца.

Петручкоў, М.Петручкоў, Пятрукоў, М.Пятрукоў, Міхалка Пятрукоў, Пятручкоў, М.Пятручкоў, Сын Петрука, Сын Петручка, Сын Пятрука.

— ягоныя псэўданімы.

Перад Першай Усясьветнай вайною ён працаваў настаўнікам у ваколіцах Івянца і ў Ашмянах.

У 1913 годзе ён меў 33 гады, таму наўрад ці быў студэнтам, але гіпотэза ўсё адно можа існаваць.

#івянеччына
#маладзечаншчына
#нашвядомызямляк

З пачаткам Першае Ўсясьветнае, альбо, як тады казалі, Вялікае вайны, расейская ўлада пачала эвакуяваць ня толькі людзей, але й розныя дзяржаўныя ўстановы, напрыклад, Маладэчанскую настаўніцкую сэмінарыю.

У 1915 годзе навучальная ўстанова была эвакуяваная ў Смаленск.

Міхась Чарот, слынны беларускі паэт, драматург, празаік, рэдактар і грамадзкі дзяяч у 1913—1917 гадох навучаўся ў Маладэчанскай настаўніцкай сэмінарыі, 2 апошнія гады навучаньня прайшлі ў эвакуацыі.

На першых 2 здымках — Міхась Чарот па сканчэньні ўстановы. На здымках ёсьць надпіс «Окончивший курсъ Молодеч», а таксама пячатка сэмінарыі.

На трэцім здымку — канвэрт, выдадзены Белпоштай да 125-годдзя Міхася Чарота. Таксама на ім выяўлены будынак Маладэчанскае сэмінарыі.

Дарэчы, першыя паэтычныя спробы Чарота належалі да часоў вучобы ў сэмінарыі, аднак, на вялікі жаль, не захаваліся.

#маладзечаншчына
#нашвядомызямляк