Страна Для Жизни

«Хваля зноў прайшлася па ўсёй Беларусі»

Прадстаўніца па сацыяльнай палітыцы Кабінета Вольга Зазулінская – пра новыя затрыманні, меры кібербяспекі і кантакты для дапамогі:

«Учора пачала паступаць інфармацыя аб затрыманнях – хваля зноў прайшлася па ўсёй Беларусі. Геаграфія дастаткова шырокая: Гродна, Жодзіна, Мінск, Брэст, Кобрын, Баранавічы, Віцебская вобласць. На гэты раз сярод затрыманых ёсць і сваякі палітзняволеных.

У канцы студзеня 2024 года мы ўжо сутыкаліся з масавай «зачысткай» сярод родных палітвязняў. Прычынай тады стала прадуктовая дапамога. Усяго было затрымана мінімум 306 чалавек, 149 з іх прыцягнуты да адміністрацыйнай адказнасці праз штрафы і спагнанне на агульную суму больш за 270 тысяч беларускіх рублёў. Мінімум 10 чалавек атрымалі адміністрацыйныя арышты, 33 чалавекі прыцягнутыя да крымінальнай адказнасці і асуджаныя на пазбаўленне і абмежаванне волі. Усяго па крымінальных артыкулах фігуравала каля 40 чалавек, некаторым удалося выехаць з краіны.

Што менавіта паслужыла падставай на гэты раз, мы не ведаем. Але вось ужо больш за 4 гады мы назіраем за тым, што падставы і не трэба.

Прашу, калі вы ў Беларусі, паклапаціцеся пра сваю бяспеку, трымайце свае тэлефоны ў чысціні, захоўвайце лічбавую гігіену. Заўсёды можна звярнуцца па дапамогу ў наладзе вашых гаджэтаў у фонд «Краіна для жыцця». Альбо зрабіць усё самастойна – можна знайсці інструкцыі на рэсурсах «Кіберпартызан».

Калі вы адчуваеце сябе ў небяспецы, звярніцеся ў фонд салідарнасці BYSOL – і спецыялісты падумаюць, як дапамагчы ў вашым выпадку.

Праверце яшчэ раз, каб дома не было нічога, што можа прыцягнуць увагу сілавікоў. Не трымайце дома пашпарты і наяўныя грошы. Памятайце, ваша бяспека залежыць ад таго, наколькі вы ўважліва ставіцеся да рэкамендацый праваабаронцаў і спецыялістаў па кібербяспецы.

Беражыце сябе ў гэтыя складаныя часы!»

📌Паведамляць пра затрыманні можна праз чат-боты: @viasnainfo (ПЦ «Вясна»), @dahary_nahami (ініцыятыва Dissidentby).

📌Калі вам патрэбна дапамога з выездам і рэлакейтам, запоўніце анкету па спасылцы.

@CabinetBelarus

«Чым мацнейшы іх ціск, тым цвярдзейшы наш намер не здавацца»

– Прадстаўніца па сацыяльнай палітыцы Кабінета Вольга Зазулінская пракаментавала чарговую хвалю ператрусаў і затрыманняў у Беларусі:

«Учора раніцай я прачнулася ад званка з Беларусі. У знаёмых маіх знаёмых пачаўся ператрус. Такія званкі паступаюць часта. Кожны дзень кагосьці затрымліваюць. Кагосьці на суткі, а кагосьці і на больш працяглы тэрмін у межах крымінальнай справы. А потым пасыпаліся паведамленні ад валанцёраў, актывістаў, маіх калег. Стала зразумела, што пачалася чарговая «зачыстка».

Беларусаў затрымлівалі па ўсёй краіне, праводзілі ператрусы не толькі па месцы пражывання, але і ў сваякоў. Адключалі сувязь, каб чалавек не мог паведаміць нікому аб тым, што адбываецца. Больш за тое, сувязь адключалі і родным затрыманых. Зачыстку праводзіў КДБ.

Вядома аб фактах страшнага збіцця. Людзей везлі ў розныя РАУСы, далей ад дома, каб родныя не маглі іх знайсці. Многія да сёння не ведаюць, дзе іх блізкія.

Мне гэта нагадала кашмар 2020 года, той перыяд, калі праваабаронцы, валанцёры, актывісты шукалі людзей пасля затрыманняў, а сілавікі рабілі ўсё, каб мы не здолелі іх знайсці. Асаблівы від катаванняў – неразуменне сітуацыі, няведанне, што менавіта адбываецца з блізкім для цябе чалавекам.

Сёння з раніцы працягваюцца ператрусы і затрыманні. Спецаперацыя КДБ арыентавана на ўсю краіну. Верагодна, такія «мерапрыемствы» праводзяцца з мэтай выявіць «нядобранадзейных», бо праз пару месяцаў у Беларусі адбудзецца чарговая паказальная кампанія «перапрызначэння самога сябе». Усё, што робіць рэжым, даўно ўжо не проста рэпрэсіі. Гэта поўнамаштабны тэрор.

Сёння, калі Беларусь зноў ахапіла хваля ператрусаў, затрыманняў і гвалту, я бачу, што гэтая сістэма мае адну мэту – зламаць нас канчаткова, прымусіць замаўчаць і жыць у страху. Але чым мацнейшы іх ціск, тым цвярдзейшы наш намер не здавацца, гаварыць яшчэ грамчэй і не забываць ніводнага чалавека, які стаў ахвярай гэтай машыны».

@CabinetBelarus