Каманда Латушкі і Рух «За Свабоду»

Выстава беларускіх гістарычных строяў у Варшаве

21 снежня ў Музеі Вольнай Беларусі адкрываецца выстава «Строй» чаліні фракцыі «Каманда Латушкі і Рух "За Свабоду"» Кацярыны Ваданосавай.

У экспазіцыі будуць паказаны 14 рэканструкцый строяў з перыяду ад XI да пачатку XX стагоддзя, сярод якіх: адзенне полацкай княгіні, юнай каралевы Боны, шляхцянкі часоў паўстання 1863–1864 гадоў, а таксама беларускіх сялян. Усе строі створаны ўручную з выкарыстаннем аўтэнтычных тэхнік і матэрыялаў: залататканых стужак, карунку, вышытых кашуль, гарсэтаў і крыналінаў.

Выстава таксама ўключае экскурсію і канцэрт Кацярыны Ваданосавай з яе песнямі, натхнёнымі беларускай гісторыяй.

Арганізатары: Музей Вольнай Беларусі і Цэнтр беларускай культуры ў Беластоку.

Адкрыццё: 21 снежня а 17:00, вул. Foksal 11, Варшава. Уваход вольны. Выстава працуе да 19 студзеня 2025 года.

Віншуем Кацярыну з узнагародай тэлеканала «Белсат»!

Чаліня фракцыі «Каманда Латушкі і Рух "За Свабоду"» Кацярына Ваданосава стварае цудоўны праект «Нітка Зорка» — серыю выпускаў пра беларускую моду розных стагоддзяў. Некаторыя з гэтых выпускаў мы ўжо паказвалі вам у нашых сацсетках.

На святкаванні 17-годдзя «Белсата» Кацярына атрымала ўзнагароду «тэлевізійная асоба году» за цыкл праграмаў, які палюбіўся беларусам і стаў натхненнем для гледачоў.

«Гэты праект не задумваўся толькі як праграма пра адзенне на беларускім ютубе, але каб паказаць гісторыю Беларусі ў розных эпохах. Мода беларусаў залежала ад розных фактараў, у тым ліку ад палітычнай сітуацыі.

Мне важна было паказаць, як мода ўпісвалася ў нашу гісторыю, як яна змянялася, як насамрэч выглядалі нашы продкі ў розныя часы.

Мне было вельмі прыемна атрымаць узнагароду, і я ўдзячная ўсёй камандзе за вялікую працу, якую мы робім у праекце "Нітка Зорка"», — пракаментавала Кацярына Ваданосава.

Я веру, што Беларусь стане ганаровым членам еўрапейскай сям’і

Спікерка КР і чаліня фракцыі «Каманда Латушкі і Рух "За Свабоду"» Анжаліка Мельнікава выступіла на канферэнцыі высокага ўзроўню ў Еўрапейскім парламенце «High-Level Conference on Belarus: Standing with the People of Belarus».

«Будучыня дэмакратычнай Беларусі залежыць ад сітуацыі ў нашым рэгіёне, які стаў полем барацьбы паміж праеўрапейскімі краінамі і Расіяй, што спрабуе захоўваць кантроль над суседзямі. Гэта супрацьстаянне выходзіць за межы вайны супраць Украіны і ўключае падтрымку рэжыму Лукашэнкі і стварэнне крызісаў на межах ЕС.

На жаль, прарасійскія сілы, сёння маюць падтрымку часткі беларускага грамадства. Таму, нам важна дасягаць тых, хто паддаўся прапагандзе, і аслабляць падтрымку агрэсараў».

Анжаліка Мельнікава вылучыла асноўныя задачы, як гэта можна зрабіць:

– Падтрымка дэмакратычных сіл і грамадзянскай супольнасці, каб яны сталі рухавікамі перамен. Важна будаўніцтва патэнцыялу дэмакратычных інстытутаў для мірнага пераходу.

– Барацьба з дэзінфармацыяй праз падтрымку незалежных СМІ і інавацыйных метадаў распаўсюджвання праўдзівай інфармацыі. Гэта таксама спрыяе фарміраванню еўрапейскіх каштоўнасцей у грамадстве.

– Захаванне суверэнітэту і нацыянальнай ідэнтычнасці праз прасоўванне беларускай культуры, мовы і гісторыі як сродкаў супрацьстаяння імперыялізму.

– Развіццё прыватнага сектара, уключаючы праграмы падтрымкі бізнэсу, стыпендыі і інкубатары для будучага эканамічнага аднаўлення.

«Беларусь мае будучыню ў еўрапейскай сям’і. Нам патрэбны не толькі санкцыі супраць рэжыму, але і рэальная падтрымка беларусаў: больш стыпендый, праграм мабільнасці і стажыровак. Я веру, што Беларусь стане свабоднай і еўрапейскай», — падкрэсліла Анжаліка Мельнікава.

Беларусы павінны бачыць, што дзверы Еўропы для іх адчыненыя

Спікерка КР і чаліня фракцыі Анжаліка Мельнікава выступіла падчас чацвёртага пасяджэння кансультацыйнай групы «Беларусь—ЕС» з удзелам кіраўніцы Аб'яднанага Пераходнага Кабінета Святланы Ціханоўскай, чальцоў АПК Беларусі, Каардынацыйнай Рады і прадстаўнікоў беларускай грамадзянскай супольнасці, а таксама прадстаўнікоў Еўрасаюза.

Анжаліка Мельнікава прадставіла пяць ключавых кірункаў, на якіх ЕС і беларускія дэмакратычныя сілы павінны засяродзіцца для доўгатэрміновых стратэгій пабудовы свабоднай, дэмакратычнай і незалежнай Беларусі:

Умацаванне дэмакратычных сіл і грамадзянскай супольнасці

Толькі сістэма моцных і эфектыўных дэмакратычных інстытутаў можа стаць процівагай аўтарытарнай уладзе. Важна падтрымліваць грамадзянскія арганізацыі як ключавую сілу перамен. Мы маем інструменты для ацэнкі патрэбаў і распрацоўкі рэкамендацый на высокім узроўні, і гэтыя рэкамендацыі павінны быць рэалізаваныя. Неабходна абапірацца на досвед арганізацый, якія працуюць з патрэбамі людзей унутры краіны.

Барацьба з дэзынфармацыяй і падтрымка незалежных медыя

Патрэбна распрацаваць эфектыўныя механізмы супрацьстаяння прапагандзе рэжыму і знешняй дэзынфармацыі. Падтрымка незалежных медыя — гэта інвестыцыі ў надзейную інфармацыю і еўрапейскія каштоўнасці, а не ўплыў ідэалогіі «рускага свету».

Абарона суверэнітэту і ідэнтычнасці

Расійскі ўплыў уяўляе пагрозу культурнаму і палітычнаму суверэнітэту Беларусі. Наша мова, гісторыя, музыка і літаратура — гэта не толькі спадчына, але і сродак барацьбы супраць імперыялізму Крамля.

Еўрасаюз — голас будучыні для Беларусі

Беларусы павінны бачыць падтрымку Еўропы. Важныя не толькі санкцыі супраць рэжыму, але і дапамога людзям: падтрымка рэпрэсаваных, больш магчымасцяў для адукацыі і прафесійнага росту. Больш Еўропы для Беларусі — гэта шлях да дэмакратыі і незалежнасці.

Дарожная карта пераходнага перыяду

Неабходна таксама прасоўваць праграму рэформаў: канстытуцыйныя змены, свабодныя выбары, празрыстую прававую сістэму.

Усё будзе добра

Лідар фракцыі «Каманда Латушкі і Рух "За Свабоду"» Павел Латушка павіншаваў дзяцей беларускіх палітвязняў з наступаючым Новым годам на навагодняй ялінцы ў Музеі Вольнай Беларусі.

Святочнае мерапрыемства было арганізавана Музеем Вольнай Беларусі і НАУ пры садзейнічанні Беларускай асацыяцыі палітвязняў «Да Волі», тэатральных калектываў «Прыехалі» і «Дзея Другая», фундацыі «Тутака», а таксама пры падтрымцы Генеральнага прадстаўніцтва Фландрыі ў Польшчы, Літве, Латвіі і Эстоніі. Кіраўнік прадстаўніцтва, Матыяс Дэ Мур, асабіста прыняў удзел у святкаванні.

Павел Латушка падзяліўся з беларускімі дзецьмі сваімі ўспамінамі пра найлепшы падарунак у дзяцінстве:

«Для мяне, як для маленькага хлопчыка, Новы год быў адным з галоўных дзён: святкаванне, казачная і неверагодная атмасфера. Чаканне таго, што ўсё зменіцца, што будзе добра і пазітыўна.

Памятаю, як калісьці мне падарылі фарбы гуаш — шэсць колераў. І гэта быў самы найлепшы падарунак, які я калі-небудзь атрымліваў. Я вельмі любіў маляваць. Тады мы малявалі на вокнах Дзеда Мароза, яліначку, Снягурачку і шмат іншага.

Нам асабліва важна ў гэтыя святочныя дні праяўляць салідарнасць і падтрымку адзін да аднаго, асабліва да дзетак, якія ня маюць магчымасці атрымаць цяпло ад сваіх бацькоў, прыходзіць да іх з цёплым сэрцам. Давайце рабіць у гэтыя дні знакі, няхай сабе і сімвалічныя, узаемнай увагі і падтрымкі.

Зычу, каб усе вашыя цёплыя жаданні споўніліся, каб з вамі заўсёды былі родныя і блізкія. Я перакананы, што ў 2025 годзе ўсё напэўна будзе добра. Са святам!» — павіншаваў Павел Латушка.

Беларускі бізнес у эміграцыі гатовы садзейнічаць дэмакратызацыі Беларусі

Чалец фракцыі «Каманда Латушкі і Рух "За Свабоду"» Алесь Міхалевіч распавёў на секцыі «Суверэнная, стабільная, дэмакратычная Беларусь» падчас стратэгічнага дыялогу «Беларусь – ЗША» пра ролю прыватнага сектара ў дэмакратычным пераходзе ў Беларусі:

«Прыватны сектар у Беларусі з’яўляецца рухавіком грамадскіх перамен, спрыяючы незалежнасці, інавацыям і павазе да чалавечай годнасці. У перыяд з 2010 па 2020 гады яго ўплыў значна ўзрос: амаль палова працоўнага насельніцтва перайшла на працу ў прыватныя прадпрыемствы. Такая атмасфера садзейнічала распаўсюджванню дэмакратычных каштоўнасцей, такіх як самастойнасць, адкрытасць і справядлівасць.

Ключавую ролю ў пратэстах 2020 года адыграла беларуская ІТ-індустрыя, якая адстойвала дэмакратыю і асуджала гвалт. Аднак рэпрэсіі з боку рэжыму і вымушаная эміграцыя бізнесу, асабліва ў ІТ-сектары, нанеслі сур’ёзныя эканамічныя страты Беларусі».

Бізнес беларусаў за мяжой захоўвае сувязь з нацыянальнай ідэнтычнасцю

«Рэжым імкнецца пакараць тых, хто спрыяў развіццю прадпрымальніцтва і дэмакратыі, абмяжоўваючы рэпрэсіі ў тым ліку супраць Imaguru і абвяшчаючы яго "экстрэмісцкай" арганізацыяй. Гэта накіравана на знішчэнне хаба Imaguru, які больш за дзесяць гадоў спрыяў інавацыям у Беларусі.

Нягледзячы на рэпрэсіі, прыватны сектар застаецца важнай прасторай для незалежнага мыслення ў Беларусі. Кампаніі ў выгнанні працягваюць захоўваць сувязь з беларускай ідэнтычнасцю. Многія з іх гатовыя вярнуцца пры паляпшэнні сітуацыі, каб садзейнічаць дэмакратызацыі Беларусі».

Прыватны сектар можа стаць магутнай сілай для дэмакратызацыі

«У 2025 годзе важна вызначыць агульныя мэты і скаардынаваныя планы. Падтрымка беларускага бізнесу — як унутры краіны, так і за яе межамі — можа стаць каталізатарам доўгатэрміновых перамен, садзейнічаючы распаўсюджванню дэмакратычных каштоўнасцей у грамадстве. Захаванне і інтэграцыя беларускіх бізнесаў у глабальныя рынкі могуць зрабіць прыватны сектар магутнай сілай для дэмакратычнай трансфармацыі ў Беларусі», — адзначыў Алесь Міхалевіч.

Разам мы можам зрабіць так, каб барацьба за дэмакратыю ў Беларусі не была марнай

Спікерка Каардынацыйнай Рады і чаліня фракцыі «Каманда Латушкі і Рух "За Свабоду"» Анжаліка Мельнікава разам з лідаркай дэмакратычных сіл Святланай Ціханоўскай і намеснікам кіраўніцы АПК Паўлам Латушкам узяла ўдзел у першай панэльнай дыскусіі «Суверэнная, стабільная, дэмакратычная Беларусь» падчас стратэгічнага дыялогу «Беларусь – ЗША».

«Я была сярод сотняў тысяч беларусаў на вуліцах Мінска ў жніўні 2020 года. Сёння яны альбо ў выгнанні, альбо ў турмах, альбо забітыя. Мы не перагарнулі гэтую старонку. Я ўсё яшчэ веру, я ведаю, што разам мы можам зрабіць так, каб барацьба за дэмакратыю ў Беларусі не была марнай. І свабодныя выбары яшчэ наперадзе».

Анжаліка Мельнікава падчас выступлення закранула тэму так званых «выбараў» ў Беларусі, якія Лукашэнка плануе правесці 26 студзеня 2025 года. Падрабязней чытайце ў картках.

Калі Украіна пераможа, беларусам таксама стане лягчэй дыхаць

Чалец «Каманды Латушкі і Руху "За Свабоду"» Ігар Сігоў падзяліўся сваімі думкамі ў інтэрв'ю для выдання «Салідарнасць» пра будучыню беларусаў:

«Самае складанае зараз — зразумець, што тое, пра што мы марылі, не адбылося ні праз год, ні нават праз чатыры. Людзі стамляюцца. Я называю гэта стратаю веры ў тое, што ўсё будзе добра. Але рана ці позна ўсё заканчваецца: і дрэннае, і добрае.

Найцяжэй тым, хто прайшоў праз катаванні, Акрэсціна, гвалт і турмы. Вось ім трэба дапамагаць — і мы з жонкай стараемся гэта рабіць па магчымасці. Знаходзім сэнс у нашым "сёння": так, эміграцыя, але трэба жыць, рухацца, нешта рабіць. Проста сесці, уткнуцца ў сцяну і плакацца — гэта нікога не ўратуе».

Але будзе і новае кола

«Калі Лукашэнка толькі стаў прэзідэнтам у 1994 годзе, кола людзей, якія яму супрацьстаялі, было невялікім. Пазней беларусы пачалі разумець, і кола пашыралася. У 2020 годзе ўзнікла вялікае кола людзей, якое ён быў вымушаны задушыць.

Апошняе кола, ведаеце, ужо ператвараецца ў велізарнае мора. Не думаю, што гэта адбудзецца адразу пасля чарговых так званых "прэзідэнцкіх выбараў", але ў Беларусі абавязкова будзе вясна».

Улада баіцца і працягвае запалохваць беларусаў

«Рэжым хоча запалохаць людзей перад выбарамі, у тым ліку з прафілактычнай мэтай. Але ж улада сама баіцца. Лукашэнка баіцца нават тых, хто побач, нават сваіх сілавікоў. У яго манія пераследу, таму ён увесь час ператасоўвае іх.

Свой ілюзорны "спакой" у краіне ён утрымлівае толькі сілай — амонам і міліцыяй. Яго "дажынкі", карцінкі і прапаганда працуюць толькі ад страху.

Лукашэнка, можа, і хацеў бы неяк вярнуць мінулае, каб яму зноў крычалі "Бацька!" з радасцю. Але ён разумее, што зараз гэта магчыма толькі пад жорсткім прымусам».

Хочацца, каб гэта хутчэй скончылася перамогай Украіны

«Тэрыторыі Украіны нельга аддаваць Расіі. Я супраць гэтага, хоць і не ўкраінец. Я разумею, што гэта няправільна. Калі Украіна пераможа, беларусам таксама стане лягчэй дыхаць».

Падтрымка беларусаў на Форуме Усходняга партнёрства

Прадстаўнік па міжнародным і еўрапейскім супрацоўніцтве АПК Беларусі, чалец фракцыі «Каманда Латушкі і Рух "За Свабоду"» Уладзімір Астапенка выступіў на Форуме грамадзянскай супольнасці Усходняга партнёрства ў Вене. Ён адзначыў неабходнасць і далей адрозніваць беларускі народ ад нелегітымнай улады ў Беларусі, падтрымліваць інстытуты, створаныя дэмакратычнымі сіламі, а таксама спрыяць узмацненню кантактаў беларусаў з еўрапейскімі партнёрамі.

Па выніках форуму была прынята рэзалюцыя, асобны раздзел якой прысвечаны падтрымцы беларускай грамадзянскай супольнасці і дэмакратычных сіл. Акрамя таго, рэзалюцыя заклікае заахвочваць мабільнасць беларускіх студэнтаў і навукоўцаў, а таксама рэалізацыю культурніцкіх і адукацыйных праграм.

«Мы заклікаем паскорыць распрацоўку сумесных дзеянняў, накіраваных на спыненне рэпрэсій, забеспячэнне вызвалення і рэабілітацыі беларускіх палітвязняў, а таксама падтрымку руху краіны да дэмакратычнай цэласнасці, распрацаваных у супрацоўніцтве з беларускай грамадзянскай супольнасцю і дэмакратычнымі суб’ектамі», — адзначаецца ў рэзалюцыі.

Удзельнікі Форуму прапануюць міжнародным партнёрам засноўваць новыя фарматы супрацоўніцтва, улічваючы дасягненні дэмакратычных сіл у межах Кансультатыўнай групы «Беларусь — ЕС», Кантактнай групы Рады Еўропы, а таксама Стратэгічнага дыялогу «Беларусь — ЗША».

Новаўвядзенне рэжыму па кантролі за беларусамі

З 1 лістапада ў Беларусі стала абавязковым аснашчэнне таксі і аўтобусаў камерамі відэаназірання. Таксама перавозчыкі павінны прайсці рэгістрацыю ў спецыяльным рэестры. Чалец фракцыі «Каманда Латушкі і Рух "За Свабоду"» Міхаіл Кірылюк распавёў выданню «DW», што бачыць у гэтых мерах інструмент для кантролю:

«Асноўная мэта такіх камер — сачэнне за палітычнымі праціўнікамі Лукашэнкі. Акрамя таго, з-за новых правілаў многія перавозчыкі не паспелі перарэгістравацца, што прывяло да скарачэння іх колькасці і росту цэн. Гэта выклікала хвалю крытыкі ў СМІ і сацсетках. Аднак абмяркоўваць пытанні сачэння для беларусаў можа быць небяспечна.

Сёння беларусы абураныя не толькі падаражаннем паездак на таксі, але і самой сістэмай, якая ставіць іх пад пастаяннае назіранне».

Відэаназіранне пад выглядам барацьбы са злачыннасцю

«Улады тлумачаць увядзенне камер так званым клопатам пра бяспеку і барацьбой са злачыннасцю. Аднак гэта не апраўдвае абмежавання правоў большасці грамадзян:

Законы павінны абараняць правы законапаслухмяных людзей, а барацьбой са злачынцамі павінна займацца міліцыя. Але ў Беларусі гэтая сістэма скажоная: заканадаўства залежыць не ад меркавання грамадства, а ад інтарэсаў Лукашэнкі, які сам эканамічна падпарадкаваны Крамлю. Такая каланіяльная мадэль кіравання стварае механізм татальнага кантролю за грамадзянамі».

Кантроль цэн як новы спосаб заробку

«Праблемы выкліканы не толькі сачэннем, але і ўмяшаннем дзяржавы ў эканоміку. Цэнамі на таксі незадаволены ўсе: для кіроўцаў яны занадта нізкія, для пасажыраў — занадта высокія. Гэты парадокс тлумачыцца бюракратычным умяшаннем:

Між пасажырам і кіроўцам уклінеўся дзяржаўны апарат, які забірае сабе львіную долю. У выніку нязручна ўсім — і спажыўцам, і прадпрымальнікам. А фінансавую выгаду атрымлівае адміністрацыя Лукашэнкі.

З новымі мерамі звычайная паездка на таксі ператворыцца не толькі ў дарагую паслугу, але і ў чарговы інструмент сачэння».