Каманда Латушкі і Рух «За Свабоду»

Як ваяры паўстання Каліноўскага адрознівалі сваіх ад чужых?

Чаліня фракцыі «Каманда Латушкі і Рух “За Свабоду”» Кацярына Ваданосава распавяла ў сваім праекце «Нітка Зорка» пра моду паўстанцаў 1863 года і тое, як яны ратаваліся ад холаду.

Паўстанне Каліноўскага пачалося акурат сярод зімы, калі для паўстанцаў былі найцяжэйшыя ўмовы. У той час не існавала ні тэрмабялізны, ні мембраннай вопраткі, ні тэрмасаў ці сучасных намётаў. Верхняе адзенне шылі найчасцей сваячніцы, а ўніформы як такой тады проста не было. Аднак ваяры мелі адметныя рысы ў адзенні, каб адрозніваць сваіх ад чужых.

Папулярнымі прадметамі адзення для паўстанцаў, а часам і для паўстанак былі чамара і, асабліва, канфедэратка (рагатыўка). Заклікам насіць іх вызначаўся нават паэт Адам Міцкевіч, які паходзіў з Наваградка.

«Вы, маладыя і старыя, мусіце насіць паўстанскія чамары, бо ўсе вы — салдаты паўстання Радзімы!» — пісаў Міцкевіч у тыя часы.

А як выглядалі чамара і канфедэратка? І ці былі гэтыя адзенні толькі мужчынскімі? Глядзіце ў відэа.

Беларускі народ — гэта еўрапейская нацыя

Спікерка Каардынацыйнай Рады і чаліня фракцыі «Каманда Латушкі і Рух "За Свабоду"» Анжаліка Мельнікава выступіла на пленарным пасяджэнні Парламенцкай асамблеі Савета Еўропы:

Спадар Прэзідэнт, Паважаныя Члены Парламенцкай Асамблеі,

Гэта сапраўды ганарова стаяць сёння перад вамі і выступаць ад імя Каардынацыйнай Рады — выбранага прадстаўнічага органа дэмакратычных сіл Беларусі. Дзякуй вам за рашэнне запрасіць нашу дэлегацыю на сесію ПАСЕ. Для нас гэта надзвычай важная матывацыя і выразны сігнал вашай падтрымкі ў нашай барацьбе за свабоду. Вітаю ўсіх вас, а таксама маіх беларускіх калег, у тым ліку кіраўніцу нашай дэлегацыі Аляксандру Мамаеву і лідара большасці Каардынацыйнай Рады, амбасадара Паўла Латушку.

Так званыя «выбары» ў Беларусі не былі ні справядлівымі, ні свабоднымі

Яны парушылі ўсе без выключэння дэмакратычныя стандарты выбарчага працэсу. Сёння ў беларускіх турмах знаходзяцца больш за 1200 палітвязняў, прынамсі сем з іх былі замучаны да смерці. За апошнія гады:

– Усе 11 апазіцыйных партый былі забаронены.
– Больш за 1800 НДА і ўсе незалежныя СМІ былі ліквідаваны.
– Як мінімум 300 000 беларусаў былі вымушаныя з’ехаць у выгнанне.
– Нашых грамадзян, якія пражываюць за мяжой, пазбавілі права голасу на выбарах.

У краіне свядома створана атмасфера страху і тэрору.

У такой сітуацыі абвешчаныя вынікі гэтых так званых «выбараў» не могуць быць прызнаныя. Мы заклікаем вас не прызнаваць гэтае махлярства, адмовіцца ад прызнання легітымнасці Лукашэнкі і рашуча асудзіць гэты фарс.

Наша дэлегацыя цалкам падтрымлівае рэзалюцыю Асамблеі, якая заклікае да «Неадкладнай неабходнасці свабодных і справядлівых выбараў у Беларусі». Я зараз агучваю сумесную пазіцыю Каардынацыйнай Рады, Офіса Святланы Ціханоўскай, Аб’яднанага Пераходнага Кабінета, большасці грамадзянскіх арганізацый і беларусаў унутры краіны, якія працягваюць супраціў рэжыму.

Сёння мы змагаемся за захаванне незалежнасці нашай краіны, якая сутыкнулася з экзістэнцыйнай пагрозай з боку Крамля і ідэалогіі «рускага міру». Расія актыўна рэалізуе стратэгію неваеннай акупацыі Беларусі. Але мы разумеем, што толькі свабодны народ можа эфектыўна супрацьстаяць пагрозам сваёй суверэннасці.

Немагчыма ўявіць свабодны народ пад кіраваннем злачынцы

Таму адзін з нашых ключавых прыярытэтаў — прыцягненне Лукашэнкі да міжнароднай адказнасці. Ён працягвае здзяйсняць злачынствы супраць чалавечнасці ў дачыненні да беларусаў, а таксама ваенныя злачынствы і акты агрэсіі супраць Украіны. Дэмакратыя пераможа толькі тады, калі адбудзецца справядлівы суд.

Беларускі народ — гэта еўрапейская нацыя

Наша гісторыя і культура — неад’емная частка еўрапейскай гістарычнай спадчыны. Але не менш важна для нас стаць поўнавартаснай часткай еўрапейскай будучыні.

Мы ўдзячныя за вашу салідарнасць і працягнем нашу барацьбу за свабоду, правы чалавека і дэмакратыю. Дзякуй вам. Жыве Беларусь!