Аб’яднаны Пераходны Кабінет Беларусі

«Людзі з інваліднасцю – як і ніхто іншы – не павінны быць закладнікамі сістэмы»

Першая намесніца прадстаўніцы па сацыяльнай палітыцы Юлія Міцкевіч – да Міжнароднага дня асоб з інваліднасцю:

«У 2016 годзе Беларусь ратыфікавала Канвенцыю аб правах інвалідаў. Быў нават распрацаваны нацыянальны план па яе рэалізацыі да 2025 года. Аднак нам вядома, як мінімум з 2020 года людзі з інваліднасцю і цяжкімі захворваннямі падвяргаюцца палітычнаму пераследу, катаванням, бесчалавечнаму абыходжанню і знаходзяцца ў турмах і калоніях.

Двое з іх, Ігар Леднік і Мікалай Клімовіч, памерлі ў зняволенні, не дачакаўшыся свайго вызвалення. Мы бачым таксама, як дзяржава пазбавіла людзей з інваліднасцю, у тым ліку дзяцей, доступу да сэрвіснай падтрымкі праз некамерцыйныя арганізацыі і дабрачынныя фонды, якія былі ліквідаваны з прычыны палітычнай сітуацыі ў краіне.

Пры гэтым на пасяджэннях ААН чыноўнікі Лукашэнкі крывадушна адмаўляюць гэтыя факты.

Нашая каманда, якая займаецца пытаннямі гендарнай роўнасці і ўразлівых груп, знаходзіцца ў сталай камунікацыі з арганізацыямі для людзей з інваліднасцю. Разам мы працуем над стратэгіямі і тактычнымі крокамі, каб змяніць сітуацыю з правамі, магчымасцямі і ўмовамі для людзей з інваліднасцю як зараз, так і ў будучыні на ўзроўні дзяржкіравання.

Мы разумеем, што сістэмныя змены патрабуюць часу, але менавіта цяпер важна пачаць кансалідацыю высілкаў усіх зацікаўленых бакоў – праваабаронцаў, міжнароднай супольнасці, актывістаў і саміх беларусаў.

Людзі з інваліднасцю – як і ніхто іншы – не павінны быць закладнікамі сістэмы. Наш абавязак змяніць гэта – перад тымі, хто ўжо страціў сваё жыццё, і перад тымі, хто працягвае змагацца за сваё права на годнае існаванне».

@CabinetBelarus

2 снежня 2024 года ў Страсбургу адбылося чарговае пасяджэнне Кантактнай групы Рады Еўропы i беларускiх дэмакратычных сiл

У iм прынялi ўдзел кiраўнiкi вядучых дэпартаментаў усiх галоўных структур Рады Еўропы (Камiтэта Мiнiстраў, Парламенцкай Асамблеi, Кангрэса мясцовых і рэгіянальных органаў улады). Беларускi бок прадстаўлялi чальцы Аб’яднанага Пераходнага Кабiнета, Каардынацыйнай Рады, Офiса Святланы Цiханоўскай, а таксама няўрадавых арганiзацый, якiя займаюцца рознымi галiнамi абароны правоў чалавека.

Прадстаўнік па міжнародным і еўрапейскім супрацоўніцтве Кабінета Уладзімір Астапенка, які быў удзельнікам пасяджэння, пракаментаваў яго ход і вынікі:

«Адбыўся канструктыўны i зацiкаўлены абмен думкамi адносна выканання Плана дзеянняў Рады Еўропы дзеля Беларусi, распрацаванага на перыяд 2024-2025 гг. У прыватнасцi, было адзначана, што задача дэмакратызацыi Беларусi застаецца ў прыярытеце Рады Еўропы i абсалютная большасць яе дзяржаў-удзельнiц актыўна падтрымлiваюць развiццё мэтавага супрацоўнiцтва з беларускімi дэмсіламi на фоне татальнай iзаляцыi рэжыму Лукашэнкi.

Яркiм прыкладам такога падыходу стала запрашэнне дэлегацыi Каардынацыйнай Рады да ўдзелу ў працы асноўных камiтэтаў Парламенцкай Асамблеi Рады Еўропы, падрыхтоўка шматлікiх нарматыўных дакументаў Рады Еўропы на беларускай мове, а таксама адкрыццё ў Вiльні Iнфармацыйнага пункта Рады Еўропы для беларусаў.

Удзельнікi выказалi перакананасць у тым, што адукацыйныя i ўсе iншыя элементы Плана дзеянняў спрыяюць еўрапейскай перспектыве для беларускага народа i ствараюць падмурак для асэнсаваных крокаў, якiя спатрэбяцца ў новай дэмакратычнай Беларусi».

@CabinetBelarus

Упершыню аб злачынствах Лукашэнкі – падчас Асамблеі дзяржаў-удзельніц МКС

«Я заклікаю нашых партнёраў – асабліва Польшчу і Латвію, якія далі прытулак большасці беларускіх уцекачоў, – падтрымаць зварот Літвы, умацаваць гэтыя намаганні па забеспячэнні адказнасці. І я шчыра веру, што сённяшняе мерапрыемства дасць удзельнікам пераканаўчыя аргументы», – адзначыў кіраўнік НАУ Павел Латушка падчас сайд-івэнта «Беларуская сітуацыя ў Міжнародным крымінальным судзе: юрысдыкцыя МКС і неабходнасць падтрымкі дзяржаў-удзельніц» у межах 23-й сесіі Асамблеі Міжнароднага крымінальнага суда.

Павел Латушка падкрэсліў, што гэта першае ў гісторыі мерапрыемства на Асамблеі Міжнароднага крымінальнага суда, прысвечанае сітуацыі ў Беларусі.

Намеснік кіраўніцы Кабінета заявіў, што рэжым Лукашэнкі стварыў неверагодна эфектыўную машыну для масавага пераследу і рэпрэсій супраць тых, каго ён лічыць «нелаяльнымі». Гэта робіцца з мэтай, як неаднаразова заяўляў сам Лукашэнка, «ачысціць беларускае грамадства».

Створаная атмасфера страху, тэрору і пераследу прымусіла каля 300 000 чалавек пакінуць сваю радзіму. Гэта значыць, што кожны трыццаты жыхар пакінуў Беларусь.

Латушка акцэнтаваў увагу ўдзельнікаў мерапрыемства ў Гаазе, што прадстаўнікі рэжыму Лукашэнкі не спыняюцца на выгнанні часткі насельніцтва за межы Беларусі; «яны працягваюць пераследваць беларусаў за мяжой».

Беларусы за мяжой і ў выгнанні падвяргаюцца: запалохванню і пагрозам гвалту; ціску і крымінальнаму пераследу іх сваякоў і сяброў; судовым пераследам, а менавіта: крымінальным справам, ініцыяваным па палітычных матывах, завочным судовым працэсам без захавання належных працэдур, канфіскацыі маёмасці; пазбаўлення іншых фундаментальных правоў.

«Гэтыя дзеянні ў сукупнасці ўяўляюць сабой злачынства супраць чалавечнасці ў форме пераследу, учыненае высокапастаўленымі прадстаўнікамі рэжыму за межамі краіны супраць беларусаў у выгнанні», – падкрэсліў кіраўнік НАУ.

«Я заклікаю іншыя краіны далучыцца да звароту Літвы. Практыка паказвае, што падтрымка іншых дзяржаў-удзельніц звароту мае вялікае значэнне для поспеху гэтага працэсу. Неабходна вярнуць беларусам веру ў дэмакратыю, прыцягнуць Лукашэнку і яго саўдзельнікаў да адказнасці за злачынствы супраць чалавечнасці ў дачыненні да беларусаў», – звярнуўся да партнёраў Павел Латушка.

Тэкст выступлення цалкам чытайце па спасылцы.

@CabinetBelarus

Сёння ў Гаазе будзе разгледжана сітуацыя ў Беларусі ў рамках 23-й сесіі Асамблеі Міжнароднага крымінальнага суда

Тут адбудзецца сайд-івэнт «Беларуская сітуацыя ў Міжнародным крымінальным судзе: юрысдыкцыя МКС і неабходнасць падтрымкі дзяржаў-удзельніц», на адкрыцці якога ад імя НАУ выступіць намеснік кіраўніцы Кабінета Павел Латушка.

Мерапрыемства будзе прысвечана звароту Літвы наконт сітуацыі ў Беларусі, які быў накіраваны ў Міжнародны крымінальны суд 30 верасня.

Мэта сайд-івэнта – прыцягненне ўвагі краін-удзельніц Рымскага статута да экстэрытарыяльных злачынстваў супраць чалавечнасці, якія ўчыняюцца рэжымам Лукашэнкі на іх тэрыторыі.

Нагадаем, каля 300 000 беларусаў былі вымушаны пакінуць краіну з 2020 года, у асноўным перабраўшыся ў Літву і Польшчу, а таксама ў іншыя 25 дзяржаў-удзельніц Рымскага статута. Нават знаходзячыся ў выгнанні, беларусы працягваюць сутыкацца з сур’ёзнымі парушэннямі правоў чалавека з боку рэжыму Лукашэнкі, уключаючы пагрозы, прад’яўленне крымінальных абвінавачанняў і завочныя судовыя працэсы, запалохванне і арышты сваякоў, ператрусы дамоў і канфіскацыю маёмасці, якая засталася ў Беларусі, а таксама іншыя пазбаўленні асноўных правоў.

Падрабязней – на канале Паўла Латушкі.

@CabinetBelarus

Дыпламатыя – гэта мастацтва кампрамісаў, але заўсёды на карысць сваёй Радзімы

«Вельмі важна, каб гэтыя курсы рыхтавалі кадры для будучай беларускай дыпламатыі, нацыянальна арыентаваныя, якія б разумелі, што галоўным для іх з’яўляецца менавіта Бацькаўшчына, Радзіма, Беларусь. І важным з’яўляецца працаваць кожны дзень на карысць вольнай незалежнай Беларусі», – адзначыў намеснік кіраўніцы Кабінета, кіраўнік НАУ Павел Латушка падчас урачыстай інаўгурацыі пятага набору праграмы спецыялізаванага навучання «Новыя кадры для Новай Беларусі», якая арганізуецца Цэнтрам даследаванняў Усходняй Еўропы Варшаўскага ўніверсітэта пры падтрымцы Міністэрства замежных спраў Польшчы і амбасады Францыі ў Польшчы.

Павел Латушка адзначыў, што ўжо многія выпускнікі праграмы з’яўляюцца часткай дэмакратычных інстытутаў Беларусі і працуюць у Офісе прэзідэнткі-элект Святланы Ціханоўскай, Аб’яднаным Пераходным Кабінеце, Каардынацыйнай Радзе, Народным антыкрызісным упраўленні, а таксама ў іншых ініцыятывах дэмакратычнага руху Беларусі. Выпускнікі праграмы «Новыя кадры для Новай Беларусі» вельмі запатрабаваныя, і іх дзейнасць аказваецца вельмі карыснай.

Павел Латушка пацвердзіў, што калі зараз сабраць усіх выпускнікоў папярэдніх чатырох набораў, лічба якіх дасягнула 77 чалавек, дадаць тых, хто скончыць пяты набор, а таксама ўключыць частку яшчэ працуючых у сістэме беларускіх дыпламатаў, якія хочуць жыць у дэмакратычнай, вольнай, незалежнай і еўрапейскай Беларусі, то ўжо існуе магчымасць забяспечыць працу не толькі МЗС дэмакратычнай Беларусі, але і замежных устаноў.

Павел Латушка падзякаваў МЗС Польшчы, Варшаўскаму ўніверсітэту, Цэнтру даследаванняў Усходняй Еўропы Варшаўскага ўніверсітэта за паслядоўную падтрымку беларусаў: «Я перакананы, што Польшча, якая сёння з’яўляецца стратэгічным партнёрам для дэмакратычных сіл, будзе стратэгічным партнёрам для незалежнай Беларусі. Польшча будзе той брамай, якая адчыніць нам магчымасці ў Еўропе».

Павел Латушка падзяліўся асабістым дыпламатычным досведам са слухачамі праграмы, адзначыўшы: «Дыпламатыя – гэта мастацтва кампрамісаў, але заўсёды на карысць сваёй Радзімы. Таму кампрамісы ў дыпламатыі сапраўды вельмі патрэбныя, іх трэба дасягаць, але заўсёды трэба думаць пра інтарэсы сваёй дзяржавы».

@CabinetBelarus

⚡Павел Латушка пракаментаваў рашэнне амбасадара Грузіі ў Балгарыі аб адстаўцы

«Як амбасадар і дыпламат я хацеў бы выказаць словы падтрымкі амбасадару Грузіі ў Балгарыі Атару Бярдзінішвілі, які абвясціў аб сваёй адстаўцы ў сувязі з адмовай кіраўніцтва Грузіі працягваць курс на еўрапейскую інтэграцыю.

Хачу таксама выказаць словы салідарнасці з грузінскім грамадствам, усімі дыпламатамі Міністэрства замежных спраў і дзяржаўнымі службоўцамі Грузіі, якія робяць прынцыповы еўрапейскі выбар. Выбіраюць свабоду і дэмакратыю, будучыню, а не мінулае для сваёй краіны.

Я веру, што ў Грузіі пераможа еўрапейская мара», – адзначыў намеснік кіраўніцы, прадстаўнік па транзіце ўлады Кабінета Павел Латушка.

@CabinetBelarus

«Будзьце першымі»: атрымайце эксклюзіўны ранні доступ да платформы «Гэта моладзь» да яе афіцыйнага рэлізу

У кастрычніку прадстаўніца па моладзевай палітыцы і студэнцтве Кабінета і дарадца Офіса Святланы Ціханоўскай Маргарыта Ворыхава аб’явіла аб стварэнні платформы «Гэта моладзь».

Неўзабаве платформа пачне працаваць у тэставым рэжыме. Маргарыта Ворыхава запрашае ахвотных паўдзельнічаць у тэсціраванні сэрвісу і атрымаць да яго эксклюзіўны ранні доступ:

«Да афіцыйнага запуску мы запрашаем абраных карыстальнікаў атрымаць ранні доступ да нашай платформы. Гэта ваш шанец пачаць карыстанне рэсурсам, створаным беларускай моладзю спецыяльна для беларускай моладзі, раней за іншых і паўплываць на яго змест і форму.

Будзьце першымі, хто ацэніць платформу, паспрабуйце розныя яе функцыі, падзяліцеся сваімі ідэямі і дапамажыце нам зрабіць прадукт лепшым.

Каб атрымаць доступ напішыце мне на m.vorykhava@belaruscabinet.org, альбо звяжыцеся з намі праз Instagram @youthofbelarus.

Спяшайцеся, колькасць месцаў абмежаваная!»

@CabinetBelarus

Мясцовае самакіраванне – падмурак дэмакратыі

«Пасля сыходу Лукашэнкі, рэфармаванне мясцовых органаў улады павінна стаць важнай часткай транзітнага перыяду, павінна адбыцца павелічэнне іх ролі і забеспячэнне сумленных выбараў на месцах, што дасць магчымасць пазбегнуць вяртання дыктатарскай вертыкалі, а таксама дазволіць хутка стварыць мясцовыя эліты», – адзначыў намеснік кіраўніцы Кабінета, кіраўнік НАУ Павел Латушка падчас адкрыцця варкшопа па канцэпцыі мясцовага самакіравання для Новай Беларусі «Кіраванне рэформай дэцэнтралізацыі, этапы пераходу і ацэнка рызык».

Мерапрыемства арганізавана Кангрэсам мясцовых і рэгіянальных уладаў Рады Еўропы ў рамках праекта Кантактнай групы Рады Еўропы па супрацоўніцтве з беларускімі дэмакратычнымі сіламі і грамадзянскай супольнасцю. Яго мэта – паляпшэнне Канцэпцыі мясцовага самакіравання для Новай Беларусі. Варкшоп прысвечаны аналізу альтэрнатыўных сцэнарыяў праходжання этапаў пераходу да дэцэнтралізацыі ў беларускім кантэксце. На аснове адпаведных тэорый рэфармавання палітыкі і досведу іншых краін былі разгледжаны ўнутраныя рызыкі і выклікі гэтага працэсу. Асноўнай тэмай дыскусій з прадстаўнікамі беларускіх дэмакратычных сіл стала паслядоўнасць рэформ і інстытуцыйная трансфармацыя.

Удзел у мерапрыемстве прынялі кансультанты і эксперты Кангрэса па мясцовай дэмакратыі і фінансавай дэцэнтралізацыі, групы незалежных экспертаў Еўрапейскай хартыі мясцовага самакіравання, Кангрэса мясцовых і рэгіянальных улад Рады Еўропы і іншыя. З беларускага боку ўдзел прынялі прадстаўнікі дэмакратычных сіл Беларусі і эксперты па мясцовым самакіраванні.

Беларусь мае глыбокую гісторыю развіцця мясцовага самакіравання: пачынаючы ад Полацкага і Тураўскага княстваў з іх выбарамі мясцовых кіраўнікоў, Вялікага княства Літоўскага з Магдэбургскім правам у гарадах і шляхецкім самакіраваннем на ўзроўні ваяводстваў і паветаў і заканчваючы ўжо першай паловай 90-х гадоў мінулага стагоддзя, калі ў 1991 годзе Вярхоўным саветам быў прыняты закон «Аб мясцовым кіраванні і самакіраванні ў Рэспубліцы Беларусь». Але з прыходам да ўлады Лукашэнкі пачалося знішчэнне дэмакратыі і адзін з першых удараў быў нанесены менавіта па мясцовым самакіраванні, калі Лукашэнка ў канцы 1994 года фактычна дабіўся стварэння прэзідэнцкай вертыкалі ўлады, што дапамагло яму потым у супрацьстаянні з іншымі галінамі ўлады: пазней былі знішчаны парламент, Канстытуцыйны суд і незалежныя СМІ.

Павел Латушка адзначыў: «Пачаткам узыходжання дыктатуры якраз стала яго [Лукашэнкі] барацьба з мясцовым самакіраваннем. Але здарыўся 2020 год. Гэта быў год, калі ў палітычных адносінах абудзіліся рэгіёны, калі беларусы праявілі свае здольнасці да самаарганізацыі – найважнейшай падставы для функцыянавання эфектыўнай сістэмы самакіравання. Узаемадапамога ў часы пандэміі, дваровыя чаты і зборы сталі прыкметамі нараджэння самакіравання знізу. І гэта каштоўна з пункту гледжання будучага развіцця краіны. Мясцовае самакіраванне адыгрывае ключавую ролю ў развіцці дэмакратычных інстытутаў любой краіны. І Новая Беларусь тут не будзе выключэннем. Эфектыўнае мясцовае самакіраванне павінна забяспечваць грамадзянам рэальны ўдзел у кіраванні сваім жыццём і вырашэнні актуальных праблем на месцах».

@CabinetBelarus

«Гэтая перамога – сведчанне таго, што міжнародная супольнасць рашуча падтрымлівае беларусаў»

Польскі суд прызнаў запыт рэжыму Лукашэнкі на экстрадыцыю Дзмітрыя Плескачова палітычна матываваным і незаконным. Прадстаўніца па сацыяльнай палітыцы Кабінета Вольга Зазулінская пракаментавала справу:

«Гэтая перамога стала вынікам зладжанай працы праваабаронцаў, польскіх юрыстаў і дэмакратычных сіл. І гэта не толькі крок да справядлівасці, але і сведчанне таго, што міжнародная супольнасць рашуча падтрымлівае беларусаў у іх барацьбе супраць рэжыму.

Мы ўдзячныя польскім уладам за іх прынцыповую пазіцыю, якая не дазваляе парушаць асноўныя правы чалавека. Гэта станоўчы прэцэдэнт. Беларусы і надалей могуць разлічваць на міжнародную падтрымку і салідарнасць.

Дзякуючы сумесным намаганням, Дзмітрый атрымаў магчымасць застацца ў бяспецы. Лічу гэта яшчэ адной перамогай у агульнай справе змагання за свабодную і дэмакратычную Беларусь».

@CabinetBelarus

Гжэгаж Схетына абраны старшынём парламенцкай групы Сейма і Сената Польшчы «За свабодную Беларусь»

Спадар Схетына – былы маршалак Сейма і міністр замежных спраў Польшчы, дзейны старшыня камісіі па міжнародных справах Сената Польшчы.

Павел Латушка, які быў запрошаны на пасяджэнне рабочай групы Сейма і Сената, ад імя Аб'яднанага Пераходнага Кабінета прадставіў дэпутатам-чальцам групы прапановы па супрацоўніцтве і дзеяннях, накіраваных на падтрымку барацьбы беларускага грамадства за дэмакратычныя перамены. Сярод прапаноў:

▪️непрызнанне выбарамі таго фарсу, які арганізуе Лукашэнка 26 студзеня 2025 года;

▪️падтрымка прыцягнення Лукашэнкі да адказнасці за злачынствы супраць беларускага народа;

▪️садзейнічанне ў легалізацыі беларускіх грамадзян у Польшчы, уключаючы беларускіх добраахвотнікаў;

▪️падтрымка ў даступным атрыманні вышэйшай адукацыі абітурыентамі з Беларусі;

▪️падтрымка беларускай ідэнтычнасці і незалежных СМІ.

Гжэгаж Схетына адзначыў, што ў інтарэсах Польшчы «захоўваць актыўную палітыку ў дачыненні да Беларусі, ажыццяўляць далейшую ізаляцыю рэжыму і адначасова праяўляць адкрытасць да беларускага грамадства».

Падрабязней – на канале Паўла Латушкі.

@CabinetBelarus

Маргарыта Ворыхава: «Па пытанні настрыфікацыі, нарэшце, дамагліся пэўных зрухаў»

Прадстаўніца па моладзевай палітыцы і студэнцтве Кабінета распавяла пра шляхі вырашэння праблем беларускіх абітурыентаў і студэнтаў у Польшчы:

«За апошнія месяцы мы атрымалі мноства зваротаў ад студэнтаў і абітурыентаў, якім кураторыўмы асветы адмаўляюць у настрыфікацыі з-за адсутнасці сертыфікатаў ЦТ, ЦЭ або іншых дакументаў. Гэтае патрабаванне стала для многіх маладых людзей бар’ерам пры атрыманні ці працягу адукацыі.

Адзначу, што правілы адрозніваюцца ў кожным кураторыўме, што прыводзіць да блытаніны і абсурдных патрабаванняў. Напрыклад, у некаторых выпадках просяць падаць апастыль на атэстат, які можна атрымаць толькі ў Беларусі. Гэта ставіць маладых людзей перад дрэнным выбарам: падвергнуць сябе рызыцы, вярнуўшыся ў краіну, ці адмовіцца ад магчымасці вучыцца.

Моладзевыя арганізацыі, актывісты і самі студэнты аб’ядналі намаганні, каб збіраць інфармацыю, дзяліцца досведам і дапамагаць адно аднаму знайсці рашэнне.

Разам з фракцыяй Каардынацыйнай Рады «Моладзевы наступ», арганізацыяй «Ліхтар» і іншымі мы накіравалі мноства лістоў польскім уладам, а Павел Латушка і Аліна Коўшык праводзілі сустрэчы з афіцыйнымі прадстаўнікамі Польшчы, каб данесці да іх сур'ёзнасць праблемы. Па пытанні настрыфікацыі, нарэшце, дамагліся пэўных зрухаў.

Нядаўна віцэ-маршалак Польшчы Міхал Каміньскі запэўніў нас, што асабіста зоймецца вырашэннем агучаных праблем.

Сярод першачарговых задач:

1️⃣ Адмена патрабавання аб прадастаўленні сертыфікатаў ЦТ/ЦЭ для беларускіх студэнтаў

2️⃣ Спрашчэнне і ўніфікацыя правіл розных кураторыўмаў

Мы разумеем, як няпроста вам зараз, але ў такія моманты асабліва важна памятаць, што вы не адны. Беларусы заўсёды трымаліся разам у цяжкія часы, і сёння – не выключэнне.

Калі вы апынуліся ў складанай сітуацыі ці вам патрэбна дапамога, не саромейцеся звяртацца да нас. Мы гатовыя вас падтрымаць».

@CabinetBelarus

У Вільнюсе прайшла акцыя падтрымкі Васіля Верамейчыка – удзельніка пратэстаў у Беларусі і абаронца Украіны, якога ўлады В’етнама выдалі рэжыму Лукашэнкі

У акцыі ўзялі ўдзел прадстаўнікі беларускай дыяспары і дэмакратычных сіл Беларусі. У тым ліку да мерапрыемства далучылася прадстаўніца па сацыяльнай палітыцы Кабінета Вольга Зазулінская.

Пасля акцыі Вольга Зазулінская адзначыла: «Варта разглядаць хадайніцтвы беларусаў аб міжнароднай абароне і прытулку вельмі персанальна, стварыць механізм праваабарончай экспертызы для прыняцця справядлівых рашэнняў.

Асабліва важна прызнаць асобую катэгорыю рызыкі для ўдзельнікаў ваенных дзеянняў ва Украіне, у гэтым я цалкам раздзяляю пазіцыю Офіса Святланы Ціханоўскай. Важна таксама супрацоўнічаць з праваабаронцамі, каб забяспечыць адвакатаванне і ацэнку сітуацыі паводле міжнародных стандартаў».

Таксама да ўдзельнікаў акцыі з дапамогай анлайн-сувязі звярнуўся прадстаўнік па абароне і нацыянальнай бяспецы Кабінета Вадзім Кабанчук.

Ён выказаўся ў падтрымку Васіля Верамейчыка і адзначыў, што яго сітуацыя і ўсе падобныя выпадкі мусяць разглядацца ўладамі краін знаходжання ў індывідуальным парадку, бо гэта вельмі адчувальная тэма: рэжым і яго спецслужбы зараз уключылі ўсе магчымыя механізмы па дыскрэдытацыі добраахвотнікаў і «паляванні» на іх па ўсім свеце.

Вадзім Кабанчук праінфармаваў аб наяўнасці міжнародных кантактаў па справе Васіля Верамейчыка, у тым ліку з зацікаўленымі бакамі ва Украіне. Прадстаўнік па абароне і нацыянальнай бяспецы Кабінета заклікаў да надання спадару Верамейчыку статусу ваеннага палоннага і да ўключэння былога добраахвотніка ў спісы адпаведнага абмену.

Удзельнікам акцыі быў адрасаваны і зварот намесніка кіраўніцы Кабінета Паўла Латушкі, у якім сярод іншага адзначана: «Мы павінны асабліва намагацца абароны інтарэсаў беларускіх добраахвотнікаў, якія рызыкавалі і рызыкуюць сваім жыццём дзеля свабоды для ўсёй Еўропы. Але мы павінны разумець, што часта гэтыя пытанні не могуць насіць публічны характар. І гэта праца, хацеў бы запэўніць вас, з нашага боку вядзецца».

Нагадаем, Васіль Верамейчык прызнаны праваабаронцамі палітычным зняволеным.

@CabinetBelarus

Канада і беларускія дэмакратычныя сілы распачалі стратэгічныя кансультацыі

Гэта аналаг Стратэгічнага дыялогу «Беларусь – ЗША» ці Кансультатыўнай групы «Беларусь – ЕС». Кансультацыі сталі вынікам дамоўленасцей кіраўніцы Кабінета Святланы Ціханоўскай з міністаркай замежных спраў Канады Мелані Жалі аб інстытуцыялізацыі адносін Канады з дэмакратычнымі сіламі.

Падобныя кансультацыі Канада нядаўна запусціла з Малдовай, а цяпер – і з дэмакратычнай Беларуссю. Іх мэта – выпрацаваць супольныя пазіцыі і прыярытэты па ключавых пытаннях, а таксама зрабіць праграмы падтрымкі больш эфектыўнымі і адпаведнымі патрэбам беларускага грамадства. Правядзенне такіх кансультацый – гэта таксама і прызнанне суб’ектнасці дэмакратычных сіл Беларусі.

Першыя кансультацыі прайшлі ў Атаве 26 лістапада па трох асноўных напрамках:

1️⃣ Палітыка, бяспека і палітзняволеныя
2️⃣ Дэмакратызацыя і падтрымка медыя
3️⃣ Прыцягненне рэжыму Лукашэнкі і яго памагатых да адказнасці і аднаўленне справядлівасці

Асобная ўвага была нададзеная так званым «выбарам» у 2025 годзе і ваенна-палітычнай сітуацыі ў рэгіёне, а таксама такім тэмам, як забяспячэнне суверэнітэту і незалежнасці Беларусі, мэтавыя санкцыі і інш.

З беларускага боку ў стратэгічных кансультацыях удзельнічалі кіраўніца Кабінета Святлана Ціханоўская, прадстаўнік па міжнародным і еўрапейскім супрацоўніцтве Кабінета Уладзімір Астапенка, прадстаўнікі Офіса Святланы Ціханоўскай, НАУ, BELPOL, а таксама журналісты незалежных беларускіх медыя.

Канадскі бок быў прадстаўлены чальцамі канадскага ўрада, МЗС, дэпартаментаў, адказных за санкцыі, пытанні міжнароднага правасуддзя і палітыку па Усходняй Еўропе. Удзел у кансультацыях узяла і амбасадарка Канады ў Варшаве Кэтрын Годзін, якая адказвае за Беларусь.

Святлана Ціханоўская: «Кансультацыі адкрылі новую старонку ў адносінах паміж Беларуссю і Канадай. Мы будзем працаваць разам для вызвалення палітвязняў, падтрымкі незалежных медыя і грамадзянскай супольнасці Беларусі. У наступным годзе Канада пачынае старшынства ў G7, і мы спадзяёмся, што Беларусь будзе адным з прыярытэтаў».

Уладзімір Астапенка: «Па выніках кансультацый бакі ўзгаднілі сумеснае камюніке, у якім у прыватнасці адзначылі, што прэзідэнцкія выбары ў Беларусі ў 2025 годзе не будуць ні свабоднымі, ні справядлівымі; звярнулі ўвагу на разнастайныя формы рэпрэсій у Беларусі, у тым ліку зняволенне без сувязі са знешнім светам; заклікалі да неадкладнага вызвалення ўсіх палітзняволеных і аднаўлення дэмакратычных свабод у Беларусі.

У камюніке адзначаная і важнасць устанаўлення кантактаў беларускай грамадзянскай супольнасці з еўрапейскімі і паўночнаамерыканскімі дэмакратычнымі інстытутамі, развiцця міжнародных сетак, што ўмацоўваюць беларускі народ у яго барацьбе за свабоду, правы чалавека і незалежнасць».

@CabinetBelarus

Чыноўнікам, якія не здзяйснялі злачынстваў, не варта баяцца пагроз Лукашэнкі

Экспертнае мерапрыемства «Шляхі выхаду з палітычнага крызісу ў Беларусі на прыкладзе польскага Круглага стала» адбылося ў Музеі Вольнай Беларусі ў Варшаве. Мэта мерапрыемства – аналіз досведу Польшчы і на яго падставе прапрацоўка магчымых сцэнарыяй дэмакратычных змен у Беларусі. Мерапрыемства было арганізавана Прадстаўніцтвам па транзіце ўлады Аб’яднанага Пераходнага Кабінета і Народным антыкрызісным упраўленнем.

Адным з асноўных патрабаванняў беларускага народа пасля беспрэцэдэнтнай жорсткасці рэжыму Лукашэнкі ў жніўні 2020 года стала правядзенне сумленных дэмакратычных выбараў пад кантролем міжнародных назіральнікаў. Па сутнасці – правядзенне транзіту ўлады, запуск працэсу перадачы паўнамоцтваў і адказнасці ў палітычнай сістэме. Сярод патэнцыйных шляхоў транзіту ўлады ў Беларусі можа разглядацца дыялог паміж уладнымі элітамі (той часткай, якая не здзяйсняла злачынстваў) і дэмакратычнымі сіламі праз фармат «круглага стала» або перамоваў. Гэты сцэнар забяспечвае мірнае вырашэнне канфлікту, дзе зацікаўленыя бакі прыходзяць да кампрамісу, што можа ўключаць у сябе палітычныя рэформы, новыя выбары ці іншыя крокі па дэмакратызацыі. Гэтым працэсам была прысвечана дыскусія ў рамках мерапрыемства.

Удзел у мерапрыемстве прынялі беларускія і польскія эксперты, палітычныя і грамадскія дзеячы, у тым ліку прадстаўнік па транзіце ўлады Кабінета Павел Латушка, в.а. прадстаўніка па нацыянальным адраджэнні Кабінета Павел Баркоўскі, спікерка Каардынацыйнай Рады Анжаліка Мельнікава, кіраўнік апарату Кабінета Валерый Мацкевіч, намеснікі прадстаўніка па транзіце ўлады Кабінета Юрый Губарэвіч і Арцём Брухан, першы намеснік старшыні Руху «За Свабоду», юрыст Алесь Міхалевіч, дырэктар Цэнтра ўсходнееўрапейскіх даследаванняў Варшаўскага ўніверсітэта Ян Маліцкі, экс-супрацоўнік пракуратуры Беларусі Аляксандр Ракіцкі, эксперт BEROC Дзмітрый Крук, палітычны аналітык Вадзім Мажэйка і іншыя.

«Умацаванне пазіцыі дэмакратычных інстытутаў і беларускага дэмакратычнага грамадства, а з іншага боку – гатоўнасць эліт да вырашэння грамадска-палітычнага крызісу ў Беларусі – перадумовы для правядзення любых перамоў. Любыя перамоўныя працэсы могуць адбывацца толькі пры ўмове адсутнасці ў ім Лукашэнкі ў якасці суб’екта. Бо Лукашэнка не пойдзе на перамовы, а эліты будуць баяцца гэта рабіць, пакуль Лукашэнка кантралюе ўладу. Асабліва важна быць падрыхтаванымі да такіх падзей: унутраны ціск, моцныя дэмакратычныя інстытуты і надзейныя знешнія партнёры, якія ў крытычны момант будуць гатовыя падтрымаць дэмакратычныя памкненні беларусаў», – адзначыў падчас мерапрыемства прадстаўнік па транзіце ўлады Кабінета, кіраўнік Народнага антыкрызіснага ўпраўлення Павел Латушка.

Павел Латушка таксама падкрэсліў: «Сацыялогія сведчыць аб тым, што 97% беларусаў хочуць жыць у незалежнай краіне – Рэспубліцы Беларусь. І я ведаю, што падобныя настроі ёсць і ў значнай частцы наменклатуры. Падчас працы міністрам і дыпламатам у мяне быў досвед узаемадзеяння з тымі, хто сёння займае ключавыя пасады ў сістэме дзяржаўнага кіравання. Важна, каб тыя чыноўнікі, якія не здзяйснялі злачынстваў, якія маюць прадзяржаўныя і прабеларускія погляды, разумелі, што галоўнай перашкодай для выхаду Беларусі з грамадска-палітычнага крызісу з’яўляецца Лукашэнка і што нацыянальным інтарэсам краіны адпавядае выхад з гэтага крызісу. Калі прадстаўнік наменклатуры не здзяйсняў злачынстваў, калі не займаўся рэпрэсіямі ці злачынствамі супраць беларускага народа, ён павінен разумець, ніхто нікога не будзе “вешаць на стаўбах”, як намагаецца запужаць чыноўнікаў Лукашэнка. Аднак разам з тым тыя, хто здзяйсняў цяжкія злачынствы, павінны разумець, што адказнасць за іх будзе непазбежнай».

@CabinetBelarus