zaniatak - падзеі Гродна і наваколля

Сёння - 3 лістапада - святкуецца Дзень Святога Губерта. Менавіта алень гэтага святога знаходзіцца на выяве герба Гродна.

❓Калі з'явіўся герб горада❓
Лічыцца, што герб быў нададзены гораду ў 1540 годзе каралевай польскай і вялікай княгіняй літоўскай Бонай Сфорца, аднак першыя пячаткі з выявай герба датуюцца 1565 годам.

На іх намаляваны алень, які скача з залатым крыжам паміж рагоў — алень Святога Губерта.

❓Што сімвалізаваў гэты герб❓
У Гродна Святы Губерт шанаваўся гараджанамі як прыклад маральнага самаўдасканалення і як заступнік паляўнічых. Побач з горадам размяшчаліся багатыя паляўнічыя ўгоддзі Белавежскай і Гродзенскай пушчы. Агароджа, цераз якую скача алень, была дададзена да герба пазней і сімвалізуе свабодалюбнасць жыхароў Гродна.

❓Хто быў такі Святы Губерт❓
Святы Губерт — каталіцкі святы, біскуп Льежскі.
Аднойчы ў час палявання здарылася страшная бура, і Губерт адбіўся ад сваіх таварышаў і заблукаў. Надзеі на выратаванне не было, і Губерт звярнуўся з малітвай да Бога, калі ўбачыў аленя, які стаяў сярод дрэў, а паміж яго рагамі ззяў крыж. Ідучы за гэтым аленем, паляўнічы і выбраўся з гушчару.
Здзіўлены паляўнічы не адрозніваўся прыстойнасцю паводзін, аднак гэты знак настолькі ўразіў яго, што ён цалкам змяніў сваё жыццё, стаўшы з тых часоў дбайным хрысціянінам.