Настаўнікі-блізняты працуюць адразу ў некалькіх школах Добруша🔸
Ірына і
Святлана Цімашэнка,
Арцём і
Артур Траянавы глядзяць адно на аднаго як у люстэрка, ды яшчэ і выбралі адзіную прафесійную дарогу ў жыцці. Іх увесь час блытаюць навучэнцы, калегі дзівяцца, наколькі яны падобныя ў шчырых імкненнях стаць лепшымі ў прафесіі.
Прадстаўніцы прыгожага полу расказваюць, што ў школе добра вучыліся. Скончыўшы 11 класаў з залатым і сярэбраным медалямі, крок у педагогіку, несумненна, зрабілі свядома. І ужо 17 гадоў працуюць з дзецьмі, пры гэтым адзначаюць, што робяць тое, што любяць, і любяць тое, што робяць. Сёстры Цімашэнка — бліскучыя філолагі, якія ўмеюць нестандартна і займальна падаць вучэбны матэрыял. Настаўніцы рускай мовы і літаратуры неаднаразова адзначаліся граматамі і падзякамі за плённую працу і паспяховую педагагічную дзейнасць. Ім абедзвюм ёсць чым ганарыцца, бо іх выхаванцы дасягаюць вышынь на рэспубліканскай прадметнай алімпіядзе, на 100 балаў здаюць выпускны экзамен па рускай мове. Ірына Міхайлаўна выкладае ў сярэдняй школе № 3, Святлана Міхайлаўна — у гімназіі.
🔹 Браты-блізняты Траянавы ў школьныя гады паказвалі дастойныя вынікі. Выдатнікі вучобы запомнілі свой выпускны вечар як прыгожае, хвалюючае і радаснае свята, на якім ім уручылі атэстаты асаблівага ўзору: Арцёму Сяргеевічу — залаты медаль, Артуру Сяргеевічу — сярэбраны. Дарэчы, абодва паступілі ў Мінскі дзяржаўны лінгвістычны ўніверсітэт. Зараз яны разам працуюць у сярэдняй школе № 5, іх урокі англійскай мовы адрозніваюцца крэатывам, заняткі цікавыя і пазнавальныя. Акрамя таго, у абодвух педагогаў ёсць класнае кіраўніцтва.Таксама добра ў iх атрымліваецца захапіць школьнікаў алімпіядным рухам. На пытанне, ці адчуваюць сябе на сваім месцы, не разважаючы, адказалі практычна разам, што ў прафесіі педагога шмат плюсоў і яны не плануюць мяняць сферу дзейнасці.