ALOVAK ｜Калекцыя творчых знаходак

Той рэдкі выпадак, калі зачапіла рэклама ў Architectural Digest, створаная з дапамогай ШІ:) І нават захацелася даведацца, што ж менавіта тут рэкламуюць.

Аказалася, Samuel & Sons — кампанія, якая спецыялізуецца на аздобных матэрыялах: стужках, тасьме, махрах і іншых дэкаратыўных элементах.

І вось тут ШІ мяне не бянтэжыць, бо:
1) ён выкарыстаны буйным брэндам
2) дзеля візуальнай ідэі, якую было б складана ўвасобіць у рэальнасці.

Затое я знайшла на сайце кампаніі раздзел Inspiration, у якім ёсць чым натхніцца майстрам і не толькі. Прынамсі, мне было цікава разглядаць, як па-рознаму можна выкарыстоўваць аздобныя матэрыялы.

Пасля адпачынку на хутары ў лесе мяне яшчэ больш натхняюць расліны. Таму, калі пабачыла гэтыя кветкі, не магла прайсці міма.

Выглядаюць яны амаль як жывыя, але ўяўляеце, яны зроблены са шкла больш за 100 гадоў назад! Гэта знакамітая калекцыя "Шкляныя кветкі" ў Гарвардскім музеі натуральнай гісторыі.

З 1886 да 1936 года майстры Леапольд і Рудольф Блашка стварылі больш за 4 тысячы (!) шкляных мадэляў раслін для вывучэння батанікі. Колькі ж тут карпатлівай ручной працы! Паўтарыць разнастайнасць прыродных фактур было няпростай задачай. Але майстэрства бацькі і сына Блашка даказала, што не існуе ніводнага ліста ці сцябліны — калючых, гладкіх, бліскучых або матавых, — фактуру якіх нельга было б перадаць у шкле.

На сайце музея можна зазірнуць у працэс: як ствараліся такія мадэлі, а таксама як іх сёння рэстаўруюць і захоўваюць.

Беларускія майстры таксама натхняюцца лесам! У інстаграме Алоўка апублікавала падборку, якую збірала з асаблівай любоўю (бо сама вельмі люблю лес і ўсё, што з ім звязана).

У ёй вы знойдзеце самыя розныя работы, натхнёныя лесам: упрыгожанні, кераміку, тэкстыль, прадметы інтэр'еру і яшчэ шмат цікавага.

Калі хочацца працягнуць лясную вандроўку, зазірніце ў інстаграм, буду рада бачыць вас там 🌲

У дзяцінстве Седрык Брэйзахер любіў гуляць у лесе каля дома. Тады ён яшчэ не ведаў, што праз шмат гадоў менавіта лес стане адной з галоўных крыніц яго натхнення.

Сёння французскі дызайнер і майстар працуе з дрэвам, але натхняецца не толькі прыгажосцю лесу, а і тым, як ён існуе. Ён імкнецца да таго, каб яго майстэрня працавала па тых жа прынцыпах, без адходаў.

Апошняя калекцыя Седрыка "Not Wasted" створана з дрэва і матэрыялу Agglomera, які ён распрацаваў сам з габлюшак, бульбянога крухмалу і вады. То бок адходы ад стварэння адной рэчы становяцца матэрыялам для наступнай, як жа гэта крута!

Спадабалася інтэрв'ю з Седрыкам, асабліва адказ на пытанне, якую параду ён даў бы самому сабе ў 10 гадоў:

"Давярай сабе. Усё будзе добра. Не бойся думаць не так, як іншыя. Гэта не недахоп, а твая сіла. Менавіта адрозненне ад іншых робіць цябе ўнікальным".