«Беларусам не патрэбная імперская Расія, каб паказваць нам, як жыць і што рабіць»

Беларуская лідарка працягвае працоўны візіт у Брусель. Ранкам у чацвер яна далучылася да Канферэнцыі высокага ўзроўню па Беларусі. У мерапрыемстве таксама ўзялі ўдзел прэзідэнтка Еўрапарламента Раберта Метсола і яго чальцы, прадстаўнікі Еўрасаюза, амбасадары і спецпасланнікі па Беларусі.

Канферэнцыя арганізаваная Еўрапейскай службай знешніх дзеянняў і Еўрапейскім парламентам з нагоды Дзён Беларусі. Галоўная мэта мерапрыемства – выказаць салідарнасць з беларускім народам і абмеркаваць шляхі падтрымкі людзей. Цягам двух панэляў удзельнікі шукаюць спосабы і метады вызвалення беларускіх палітвязняў, захады міжнароднай супольнасці па прыцягненні рэжыму Лукашэнкі да адказнасці, спосабы ўзмацніць падтрымку ахвяраў рэжыму і іх сем'яў, а таксама шляхі і перспектывы пабудовы дэмакратычнай будучыні Беларусі.

Важнае з тэзісаў Святланы Ціханоўскай:

«Нягледзячы на шматвяковы прыгнёт імперыямі і тыраніямі, беларусы заўсёды змагаліся за еўрапейскую будучыню. Беларусам не патрэбная імперская Расія, каб паказваць нам, як жыць і што рабіць. У нас ёсць свой гонар, культура, ідэнтычнасць. І гэта тое, што мы баронім. Гэта тое, што Расія спрабуе знішчыць. Яны сціраюць нашую культуру і перапісваюць нашую гісторыю.

Я заўсёды кажу: ніхто не можа вызваліць Беларусь у адзіночку. Гэта наш агульны абавязак: вызваліць палітвязняў, прывесці краіну да свабодных і сумленных выбараў.

Нашая задача – вызваліць Беларусь з расійскіх кіпцюроў, адрадзіць нашую нацыянальную ідэнтычнасць і зрабіць краіну гарантам міру і бяспекі, а не пагрозы.

Мы не можам паддацца стомленасці. Мы не можам пакінуць нашых палітвязняў. Мы павінны змагацца, пакуль кожны не будзе вольны. Пакуль Беларусь не стане вольнай».