Грэка-католікі Беларусі

У сённяшнім Евангеллі Ян. 20, 19-31 Тамаш кажа, што не паверыць ва Уваскрасенне Госпада, пакуль не ўкладзе палец свой у раны ад цвікоў і руку сваю не ўкладзе ў бок Яго. Тамаш — святы, асабліва актуальны для нашага часу. Сучаснасць адзначана дзвюма важнымі рысамі: скептыцызмам і эмпірызмам — тымі самымі рысамі, якія мы можам распазнаць у Тамаша.

І калі ўваскрослы Ісус зноў з'яўляецца, Ён запрашае таго, хто сумняваўся, паглядзець, убачыць і дакрануцца. Але потым гучаць гэтыя пранізлівыя словы: «Ты паверыў, таму што ўбачыў Мяне? Блаславёныя тыя, хто не бачыў, а паверыў».

Калі б мы ўпарта сцвярджалі — нават у галіне навукі — што будзем прымаць толькі тое, што можам ясна бачыць, чаго можам дакрануцца і што можам кантраляваць, мы б мала што ведалі пра рэчаіснасць. Гэта дапамагае нам лепш зразумець словы Ісуса, скіраваныя да Тамаша. Справа не ў тым, што мы, хто не бачыў, але паверыў, задавальняемся нейкім бедным сурагатам бачання. Не, мы названыя блаславёнымі, больш блаславёнымі за Тамаша. Бог робіць шмат такога, чаго мы не можам убачыць, вымераць, кантраляваць, да канца зразумець. Але менавіта свядомая вера дазваляе чалавеку палюбіць такога Бога.

Біскуп Роберт Баррон

АНТЫПАСХА 2025 (Нядзеля Тамаша) - 27 КРАСАВІКА. Сёння 8-мы дзень, калі праслаўляем Уваскрослага Хрыста Чалавекалюбца. Чытаем Евангелле паводле Яна 20:19-31. =У старажытнай рымскай малітве знаходзім словы: "Госпадзе, дай нам ласку глыбей зразумець, наколькі магутны ёсць Дух, Які нас адрадзіў, і наколькі каштоўная Кроў, якой мы былі адкуплены".

NOVENDIALI - 9 дзён малітваў за супакой душы спачылага Папы Францішка - пачаліся ўчора (26.04.2025). =У Літургіі бярэцца (дадаёцца) Літанія за памерлых з малітвай: "Божа духаў і ўсякага цялеснага стварэння..". =Пасля Літургіі дадаёцца: "У блаславёным сьне яго...". (Паніхіда - Малітаўнік с. 767) ды спяваецца: Хрыстос уваскрос... (3х). =Малітвай "Божа духаў і ўсякага цялеснага стварэння.." (Малітаўнік с. 759) могуць карыстацца так сама вернікі ў асабістай малітве.

ГРЭКА-КАТАЛІЦКАЯ ПАРАФІЯ МАЦІ БОЖАЕ ФАЦІМСКАЙ, ГАРОДНЯ
вул. Гараднічанская 32а
РАСКЛАД НАБАЖЭНСТВАЎ
на 28 красавіка – 4 траўня

4 траўня, нядзеля Міраносіцаў
10.00 – Літургія св. Яна Залатавуснага
- Ружанец

🙏 26 красавіка 2025 году пахавальную Літургію Папы Францішка на лацінскай мове ўзначальваў 91-гадовы італьянскі кардынал Джавані Батыста Рэ, дэкан Калегіі кардыналаў. Разам з ім маліліся каля 5 тысячаў канцэлебрантаў – кардыналаў, біскупаў і сьвятароў.

Беларускі епіскапат на пахаваньні Папы Францішка прадстаўляюць архібіскуп Менска-Магілёўскі Юзаф Станеўскі і дапаможны біскуп Менска-Магілёўскай архідыяцэзіі Аляксандар Яшэўскі.

На заканчэньне апошняга разьвітаньня з памерлым Рымскім Архірэем Мельхіцкі грэка-каталіцкі Патрыярх Антыёхіі Юсэф Абсі разам з іншымі першаярархамі Ўсходніх Цэркваў прачытаў малітву на грэцкай мове.

На пахавальнай Імшы прысутнічаюць каля 160 афіцыйных дэлегацый з розных краінаў сьвету: вялікія ўрадавыя прадстаўніцтвы Аргенціны і Італіі, 12 дзеючых манархаў, 53 кіраўнікі дзяржаў, 2 спадчынныя прынцы, 15 прэм’ер-міністраў, 6 віцэ-прэзідэнтаў, 3 намесьнікі прэм’ер-міністра, 7 сьпікераў парламентаў, 14 міністраў замежных спраў, 9 старшыняў міжнародных арганізацый, у тым ліку ААН, Рады Еўропы і АБСЕ, а таксама міністры, паслы і іншыя госьці.

Разьвітацца з Папам Францішкам прыбылі прадстаўнікі розных хрысьціянскіх Цэркваў і іншых рэлігіяў, сярод якіх Патрыярх Канстанцінопальсікі Барталамей І, прадстаўнікі Маскоўскага патрыярхату.

🙏 Вечарам у пятніцу, 25 красавіка 2025 году, кардынал Кэвін Фарэл, камерленга Сьвятой Рымскай Царквы, узначаліў базыліцы сьв. Пятра цырымонію закрыцьця труны з целам спачылага Папы Францішка. Цырымонія была закрытай, на ёй прысутнічала абмежаванае кола найбліжэйшых супрацоўнікаў Папы і ягоныя сваякі.

Згодна са звычаем, у труну былі пакладзены манеты, выбітыя падчас пантыфікату, а таксама афіцыйныя медалі пантыфікату за кожны год служэньня. У металёвым цыліндрычным кантэйнеры знаходзіцца «Rogito» — натарыяльны дакумент на лацінскай мове, падрыхтаваны цырымоніямайстрам папскіх літургічных службаў, які зьмяшчае біяграфічную інфармацыю пра спачылага, апісаньне яго пантыфікату і зьвесткі пра адыход у вечнасьць.

Напрыканцы цырымоніі на цынкавую труну было пастаўлена вечка з крыжам, гербам памерлага Папы і таблічкай з яго імем, датамі жыцьця і Пятровага служэньня. Цынкавая труна была запячатана пячаткамі камерленга, Прэфектуры папскага дому, Бюро літургічных цэлебрацый і Капітулы базылікі сьвятога Пятра. Пасьля закрыцьця вонкавай драўлянай труны яна таксама была апячатана. На яе вечку — крыж і герб памерлага Папы.

Праз усю ноч капітула базылікі сьв. Пятра забясьпечыла малітоўнае чуваньне ля труны Сьвятога Айца.

Праваслаўны першаярарх асабліва падкрэсьлівае сумесныя намаганьні, скіраваныя на аднаўленьне хрысціянскай еднасьці. «Калі ў 2014 годзе з маёй прапановы і ініцыятывы мы паехалі ў Ерусалім, мы маліліся, укленчыўшы адзін каля аднаго, перад Магілай Гасподняй», — узгадаў Патрыярх, дадаўшы, што менавіта тады, падчас перамоваў у Сьвятой Зямлі, ён прапанаваў Папу Рымскаму разам адзначыць у 2025 годзе 1700-годдзе скліканьня Першага Сусьветнага сабору ў Нікеі. «Было б цудоўным і сымбалічным актам паехаць туды разам, каб адзначыць гэты гістарычны юбілей і пагаварыць пра далейшы шлях нашых Цэркваў-сёстраў да супольнай Чашы», – сказаў тады Рымскаму Архірэю Патрыярх Барталамей, на што Папа Францішак, паводле яго словаў, адказаў: «Гэта выдатная думка, выдатная ідэя і прапанова. Будзем спадзявацца, што будзем у добрым здароўі і зможам зьдзейсьніць гэтую пілігрымку ў Нікею. І калі Госпад не дазволіць, то нашыя пераемнікі зробяць гэта».

Папа Францішак неаднойчы пацьвярджаў гэтае жаданьне ў сродках масавай інфармацыі і пры сустрэчах з прадстаўнікамі Канстанцінопальскага патрыярхату, якія наведвалі Рым, да апошніх дзён свайго жыцьця.

«Молімся, каб Уладар жыцьця і сьмерці ўзнагародзіў яго за ягоныя шматлікія намаганьні для Царквы і ўсяго чалавецтва», – сказаў Патрыярх Барталамей і выказаў спадзяваньне, што Госпад узьвядзе на Пасад сьвятога Пятра дастойнага пераемніка, які будзе працягваць яго каштоўную працу для ўсяго чалавецтва, асабліва для хрысьціянства і найперш для збліжэньня нашых Цэркваў-сёстраў, з канчатковай мэтай іх поўнай сустрэчы ля супольнай чашы. «Вечная памяць, браце папа Францішак», – завершыў свой зварот праваслаўны першаярарх.

Паводле Vatican news (укр. рэд.) і афіцыйнага сайту Сусьветнага патрыярхату Ec-patr.org.