Барацьба з Хэлоўінам прыйшла да свайго лагічнага фіналу. Уся віна свята, якое мала чым адрозніваецца ад звычайнага карнавалу ці айчыннага калядавання, дзе людзі апроч “квадробінгу”, яшчэ апранаюцца ў тым ліку ў касцюм чорта, толькі ў тым, што яно не мясцовае паводле паходжання. Нібыта 8 сакавіка ці Першамай у нас прыдумалі.

Свята ўжо даўно страціла свой першапачатковы паганскі сэнс, што нават выяўляецца ў яго хрысціянскай назве, якая літаральна перакладаецца як “канун дня ўсіх святых”. А апошнім часам дык і зусім камерцыялізавалася, як і рэшта святаў.

Але запарэбрыкавым змагарам з англасаксамі і іхным беларускім памагатым папулярнасць Хэлоўіна моцна муляла вочы, у выніку яны дамагліся яго фактычнай забароны на тэрыторыі “Саюзнай дзяржавы”. Але тут у расейскія і беларускія школы пракралася імпартазамяшчэнне - Вялесава ноч. І вось гэтае свята ўжо наўпрост з’яўляецца паганскім, што адлюстравана ў самой яго назве ў гонар славянскага боства. І прасоўванне падобных неапаганскіх ідэяў, якія часта звязаныя з расейскімі неанацыстамі, сапраўды выклікае занепакоенасць.