Чартоўскі добрая кава

Кава ўвечары гэта некарысна, але толькі не для гэтага хлопца. Сёння культаваму "Драйву" Нікаласа Рэфна споўнілася роўна 13 гадоў (паглядзець з беларускімі цітрамі можна тут).

Драйв (Drive), 2011

#кінакава
#у_гэты_дзень

Настрой ужо нейкі восеньскі, таму #кінакава сёння самотна-задумённая: проста Барыс Карлаф п'е каву з цыгарэткай у перапынку на здымках "Нявесты Франкенштэйна", 1935-ы год.

(так напраўду там можа была і гарбатка, але ж я стаўлю на каву)

#кінакава

Венецыянскі фестываль скончыўся перамогай "Пакоя па суседству" (The Room Next Door) Пэдра Альмадовара. Віншуем майстра з першай венецыянскай узнагародай!

Што яшчэ цікавага адбылося на фестывалі:

🦁 Шмат абмеркаванняў выклікала стужка "Бруталіст" (The Brutalist) Брэйдзі Коберта – манументальная гісторыя аб яўрэйскім архітэктары, што эмігруе ў ЗША пасля вайны. Некаторыя крытыкі былі ўпэўненыя ў перамозе "Бруталіста", але фільм атрымаў толькі (ну як толькі) Срэбнага ільва за рэжысуру.

🦁 Спецыяльным прызам журы была адзначана стужка "Красавік" (April) грузінскай рэжысёркі Дэі Кулумбегашвілі пра жыццё лекаркі-гінеколага з правінцыяльнага гарадка (па словах крытыкаў, вельмі цялеснае, жаночае і цяжкае кіно).

🦁 Сярод дакументальных стужак бачыла шмат водгукаў на "Рыфеншталь" (Riefenstahl) Андрэса Вееля, які даследуе спадчыну і пасляваеннае жыццё галоўнай нямецкай прапагандысткі – вось гэтую прэпарацыю "простага выканаўцы" злачынстваў мне як беларусцы было б асабліва цікава паглядзець.

🦁 Ніколь Кідман атрымала ільва за лепшую жаночую ролю ў "Малышцы" (Babygirl) і цяпер мае галоўныя прызы ўсіх галоўных фестываляў (але ці захацелася мне паглядзець "Малышку"? усё яшчэ не)

🦁 Не абышлося і без скандалаў: дакументальны фільм "Рускія на вайне" (Russians at War) руска-канадскай рэжысёркі Анастасіі Трафімавай аб акопным жыцці расейскіх салдатаў выклікаў шмат пратэстаў, бо, па-першае, занадта спачувае акупантам, а па-другое, фільм быў зняты на расейскім баку і хіба ўвогуле ёсць прапагандысцкім заказам. Былі таксама праблемы і ў ізраільскай стужкі "Аб сабаках і людзях" (Of Dogs and Men), спрадзюсіраванай Аляксандрам Раднянскім, – гэты фільм пра пошук дзяўчынкай сабакі ў разбураным падчас атакі 7 кастрычніка кібуцы выклікаў пратэсты арабскіх дзеячаў кіно. Як бы там ні было, ад сваіх рашэнняў паказваць гэтыя фільмы дырэкцыя фестывалю не адмовілася – можа, гэта і добра, што нехта яшчэ мае дастаткова аўтарытэту, каб трымаць сваю лінію.

🐞 І каротка пра чаканыя навінкі: "Бітлджус Бітлджус" прынялі хутчэй цёпла і з падзякай Ціму Бёртану за вяртанне да кіно; працяг "Джокера" падзяліў крытыкаў на wow/boo (як, прынамсі, было і з самім "Джокерам"); Анджэліне Джолі прарочаць "Оскар" за ролю Марыі Калас у "Марыі"; "Квір" выйшаў не вельмі, але для Крэйга гэта хіба лепшая роля ў кар'еры; серыял "Дысклэймер" Куарона атрымаў нядрэнныя адзнакі, то чакаем.

Калі нешта прамінула, пішыце ў каментары, абмяркуем!

#фестывалі

На Netflix выйшлі ўсе 6 эпізодаў "Ідэальнай пары" (The Perfect Couple) — чарговага серыяла з серыі "пакуты багатых белых людзей з Ніколь Кідман" (для іх ужо можна завесці свой асобны жанр). Як ува ўсіх такіх шоу, тут ёсць усе сарты крынжовых стэрэатыпаў: "адзіны-супраць-усіх" персанаж з сярэдняй клясы, напышлівая польская служанка, мудры чорнаскуры паліцэйскі з неахайнай, але разумнай белай напарніцай, і нават нешта падобнае на індыйскія танцы ў застаўцы — шчыра кажучы, я так і не зразумела, ці гэта ў шоўранераў такая самаіронія, ці гэта яны проста шчыра весяляцца. Часткі сюжэта і стылю здымак таксама нацяганы з розных падобных крыніц: допыты як у "Вялікай маленькай хлусні", сямейныя зносіны як у "Белым лотасе", герметычнасць як у "Нажы вонкі". У той жа час, тут ёсць няхітры дэтэктыў, летнія вайбы і вельмі моцны каст (Дакота Фанінг, Мэган Фэйхі з "Белага лотаса", Леў Шрайбер з "Рэя Донавана", Ів Х'юсан з "Дрэнных сясцёр"). Нядрэнны guilty pleasure на 6 гадзін, калі вас не нервуе міміка Кідман.

#навінка

Хуткі анонс для ўсіх, хто зацікаўлены ў кіно прафесійна: сёння а 19-ай па менскім часе адбудзецца бясплатны майстар-клас беларускага рэжысёра і заснавальніка Кінашколы Андрэя Палупанава "Рэжысура vs фільммэйкінг", дзе будуць абмяркоўвацца падабенства і розніца паміж гэтымі паняццямі, што робіць рэжысёр і што робіць фільммэйкер, як гэта выглядае на практыцы і як сучаснасць уплывае на гэтыя дзве прафесіі. Зарэгістравацца для ўдзелу можна ў інстаграме спадара Андрэя, а знайсці спасылку на zoom-пакой — тут.

#bycinema

#кінакава святочная — сёння ўсеагульнаму ўлюбёнцу і дзіцяці Беларусі Кіяну Рывзу спаўняецца 60 гадоў.

Прыгожы постэр постапакаліптычнага мюзікла (!) "Канец" (The End) з Тыльдай Суінтан, Майклам Шэнанам І Джорджам МакКеям, які распавядае пра багатую сям'ю, што жыве ў бункеры пасля канца свету і аднойчы сутыкаецца за нечаканым госцем. Прэм'ера — дням на фестывале ў Талурайдзе (не Венецыяй адзінай жыве зараз свет кіно, а хутка будуць яшчэ і прэм'еры з Таронта).

#постэр

Учора распачаўся 81-ы Венецыянскі фестываль, дзе ўпершыню пакажуць даволі шмат цікавых навінак:

🎬 Бітлджус, Бітлджус (Beetlejuice, Beetlejuice) — прэм'ера працягу макабрычнай камедыі пра Бітлджуса ад самаго Ціма Бёртана ўжо адбылася на адкрыцці фестываля, і водгукі пакуль больш станоўчыя: крытыкі кажуць, гэта бадай што лепшы Бёртан за апошнія гады (трэйлер)

🎬 Джокер: вар'яцта ўдвох (Joker: Folie à Deux) — яшчэ адзін чаканы сіквел з Хаакінам Феніксам і Лэдзі Гагай у галоўных ралях і Тодам Філіпсам у рэжысёрскім крэсле, які зноў паабяцаў, што гэта яго апошні фільм пра Джокера 🌚 (трэйлер)

🎬 Марыя (Maria) — баёпік аб знакамітай опернай спявачцы Марыі Калас у выкананні Анджэліны Джалі

🎬 Квір (Queer) — гарачая рамантычная драма ад Лука Гуаданьіна аб амерыканскім экспаце (Дэніел Крэйг), які пераследуе маладзёна ў Мексіцы 40-ых гадоў

🎬 Ваўкі (Wolfs) — вяртанне на экраны дуэта Брэда Піта і Джорда Клуні ў крымінальным экшане аб прыбіранні трупаў, наркотыках і нечым такім (трэйлер)

🎬 Пакой па суседству (The Room Next Door) — першы англамоўны фільм Пэдра Альмадовара аб старых сяброўках (Джуліана Мур і Тыльда Суінтан), якія сустракаюцца ў нечаканых абставінах (трэйлер)

🎬 Дысклэймер (Disclaimer) — серыял Apple TV аб журналістцы (Кейт Бланшэт), якая ўсё жыцце выкрывала чужыя таямніцы, і вось нехта вырашыў выкрыць яе. Apple вядомыя сваім падыходам да серыялаў "возьмем суперзорку, а ўсё астатняе як пойдзе", але ў гэтага праекта рэжысёрам выступае Альфонса Куарон, таму можа атрымацца нешта цікавае (трэйлер)

Таксама маю персанальны антытоп таго, чаго я да гэтага фестываля не чакаю:
🌚 Фільм "Малышка" (Babygirl) пра БДСМ-стасункі Ніколь Кідман і яе маладога інтэрна (мне ад яе вечнай маладосці і так неяк ніякавата)
🌚 Другая частка вестэрн-эпапеі "Гарызонты" (Horizon: The American Saga - Chapter 2) ад Кевіна Костнэра (мяне аж скруціла ад таго, наколькі дрэннай была першая частка, дзякуй, хопіць і яе)

А ў вас якія чаканні ад сёлетняй Венецыі?

#фестывалі

#кінакава ў працяг нямецкай тэмы: галоўная зорка нямецкага кіно Марлен Дзітрых п'е каву з Орсанам Уэлсам і Рытай Хэйвард дзесьці ў 1945-ым. У Дзітрых і Ўэлса наперадзе сумесная праца над "Пячаткай зла" (Touch of Evil), а ў Рыты і Ўэлса — "Лэдзі з Шанхая" (The Lady from Shanghai) ды цяжкі развод.

Інтрыга зноў доўга не пратрымаліся – сапраўды, на здымках элементы дыярамы Нямецкай кінематэкі, прысвечанай здымкам "Кабінета доктара Калігары" (Das Cabinet des Dr. Caligari) Роберта Вінэ – бадай што самага знакамітага фільма эпохі нямецкага экспрэсіянізму. Нямецкі экспрэсіянізм пазнаем па сюрэалістычных, скажоных дэкарацыях (увага на заднікі дыярамы) і даволі змрочных сюжэтах, часцяком звязаных з гіпнозам, снамі і кашмарамі.
Віншую пераможцу, а тэматычная паштоўка вось яна!

Увогуле, нямецкі музей кіно мне спадабаўся, таму бліжэйшым часам буду пісаць пра нейкія цікавосткі з іх экспазіцыі ды пра нямецкае кіно – стаўце вашыя агеньчыкі ці яшчэ штосьці добрае, калі вам будзе цікава.

Адміну зноўку можна вандраваць, таму для вас – вандровачная разыгранка: хто першы назаве ў каментах, што за фільм загаданы на здымках, атрымае ад канала тэматычную паштоўку.

(паштоўка паляціць з Польшчы, адрас запытаю канфідэнціяльна і захоўваць не буду)

#разыгранка
#кінавандроўкі