знічка ўпадзе
і сканае ў вадзе
больш анікуды
нас не вядзе

чуеш ці не?
знічка ўпадзе
больш анікуды
не давядзе

у нашым святле
схаваем яе
заблукаем у рэштках
саміх сябе

чуеш ці не?
схаваем яе
заблукаем
у рэштках
саміх сябе

нястача вады
запаляе агні
нястача святла
пячэ дабяла

чуеш ці не?
нястача вады
чуеш ці не?
пячэ дабяла

чуеш ці не
ведаю ўжо
не заб'ецца ніколі ўжо сэрца маё

чуеш ці не
больш я не на зямлі
з балотаў мой голас да ўсіх данясі

На паверхні балота растуць хмызнякі: верас, багун і іншыя расліны, якія вельмі добра гараць, бо насычаныя вялікай колькасцю эфірнага алею. Вецер хутка гоніць полымя па паверхні, плотны і едкі дым засцілае ўсё навокал: калі не атрымалася спыніць распаўсюд агню ў пачатку пажара, далей зрабіць гэта немагчыма.

гары, мая ельня, выпарайся жыўцом,
па табе застанецца толькі фантом
выпарайся жыўцом, гары, мая ельня,
мы з табою ніколі не змеркнем

мы з табою ўзляцім нібы зорка
абалонка мая — абалонка твая
мы асвецім нябёсы на золку
гэта зорка Венера ўзышла