Кнігаўка

Традыцыйна ў пачатку новага месяца падводзім вынікі папярэдняга. Мы нават не мелі сумневаў адносна таго, якая кніга будзе лідарам топа ў снежні. Так і атрымалася, што тры кнігі Толкіна вы куплялі часцей за астатнія кнігі.

Таксама прыемна бачыць у топе нон-фікшн ад аўстрыйскага псіхолага Віктара Франкля. І зноў, як і ў лістападзе, у пяцёрцы ўпэўнена трымаецца Альгерд Бахарэвіч са сваімі «Сабакамі Эўропы», за якіх у снежні ён атрымаў Ляйпцыгскую кніжную прэмію.

Адзначым 5 знакавых рэчаў, якімі для нас запомніцца 2024 год.

1. КАМАНДА.
Менавіта дзякуючы зладжанай і творчай рабоце Насты і Юрыя кнігі даходзяць да чытача. Гэта — сапраўдны скарб! З такой камандай любыя вышыні будуць дасягнутыя, тут можна не сумнявацца.

2. ТРЫЛОГІЯ ТОЛКІНА.
Ігар Кулікоў здзейсніў сапраўдны подзвіг перакладчыка, перастварыўшы па-беларуску "Валадара Пярсцёнкаў". Бязмерна ўдзячныя за гэта, як і ўдзячныя ўсім аўтарам, перакладчыкам, рэдактарам, карэктарам, мастакам, якія супрацоўнічаюць з намі. Для выдавецтва таксама важны той факт, што ўпершыню было завершанае шматтомнае выданне.

3. КНІГАРНЯ Ў ВАРШАВЕ.
У лютым 2024 года мы адкрылі беларускую кнігарню ў Варшаве па адрасе ul. Kłopotowskiego 4. Як жа яна дапамагае камунікацыі з чытачамі! Знаходзячыся ў кнігарні, выдатна разумееш, як патрэбныя людзям кнігі, і ўсё, што ты робіш, — не дарма.

4. ВЯРТАННЕ ГАРЫ ПОТЭРА.
Пасля складаных двухгадовых перамоў і адмовы супрацоўніцтва з беларусамі, нам удалося з дапамогай сяброў усё-ткі вярнуць кнігі Джоан Роўлінг у беларускі кантэкст. Выданне кніг пра хлопчыка, які выжыў, будзе працягнутае!

5. АМАЗОН.
Мы выйшлі на самы магутны маркетплэйс у свеце не так даўно і ахапілі 15 краін у Еўропе і Паўночнай Амерыцы. Запусцілі фулфімэнт, калі нашы кнігі захоўваюцца на амазонаўскіх складах, і заказы адпраўляюцца наўпрост адтуль, без нашага ўдзелу. Сістэма настолькі цікавая, як і складаная. Даступнасць кніг па-за Польшчай значна ўзрастае, бачым у гэтым вялікую перспектыву.

Пра тое, што чакае нас у 2025 годзе, напішам праз пару дзён. Толькі ў студзені — лютым мы дакладна выдадзім каля дзясятка навінак. Сачыце за анонсамі.

Шчаслівага Новага году! ⭐️

Заканчваецца 2024 год. Уражанні ад яго супярэчлівыя. Нібыта назіраецца рост, а калі разбярэшся — адчуваеш, што б'ешся аб непрабіўную сцяну. Прарываў няма. На жаль, беларускі кніжны рынак як чыннік уздзеяння на наша грамадства ў глабальным плане па-ранейшаму займае маргінальныя пазіцыі. Нешта выходзіць, можна, канечне, скакаць ад радасці з гэтай нагоды, але для нас гэтага мала.

Летась мы выдалі 30 папяровых кніг, з іх 18 новых пазіцый. Яны размеркаваліся так: пераклады — 7, беларуская проза — 5, нон-фікшн — 3, дзіцячыя кнігі — 3, паэзія — 0. У параўнанні з 2023 годам — ні больш, не менш. У планах было 40-45 пазіцый, але рэсурсаў на такі аб'ём бракавала.

У 2024 годзе мы надрукавалі 27 790 экзэмпляраў. У сукупнасці з накладамі папярэдніх 2 гадоў прыкладна 60 % застаецца яшчэ на складзе.

І гэта пры тым, што цікавасць чытачоў расце. Цяпер мы маем чатыры ўласныя пляцоўкі для распаўсюду: knihauka.com, кнігарня "Кнігаўка" ў Варшаве, Allegro, Amazon. Агулам мы абслужылі больш за 8 000 заказаў. Гэта вельмі крута!