➡️ Заява Руха Салідарнасці "Разам"
НЕ - АДБЕЛЬВАННЮ РАСЕЙСКАГА ІМПЕРЫЯЛІЗМА!
Расейска-украінская вайна паказала ўсю злачыннасць, агіднасць і нялюдскасць расейскага імперыялізму.
Рух Салідарнасці "Разам" падтрымліваў, падтрымлівае і будзе заўжды падтрымліваць Украіну і змаганне гераічнага ўкраінскага народа за вызваленне акупаваных расейскімі войскамі ўкраінскіх тэрыторый.
Адначасна мы бачым відавочнае адбельванне людабойскага расейскага імперыялізму не толькі з боку краінаў БРІКС ды краінаў, дзе раней з дапамогай Масквы былі ўсталяваныя дыктатуры, але і з боку пэўных сілаў Захада, і нават - з боку часткі ўкраінскага кіраўніцтва.
Гэта праяўляецца, у тым ліку, ў спробах занізіць маштаб генацыду мірнага ўкраінскага насельніцтва, які ажыццяўляюць расейскія войскі, парушаючы ўсе міжнародныя канвенцыі і нормы, -- бо афіцыйная лічба 9 614 чалавек забітымі пасля больш за паўтары гады жахлівай вайны і акупацыі вялікай плошчы ўкраінскіх тэрыторый супярэчыць не толькі рэчаіснасці і здароваму сэнсу, але наўпрост прыводзіць да аналогіі з рэгіянальнымі войнамі на Балканах, дзе, ў адрозненне ад Украіны, пасля апрылюднення лічбы ў 8 000 мусульманаў, якія зрабіліся ахвярамі генацыду ў Срэбніцы, Захадам былі прынятыя імгненныя рашэнні, якія прывялі нават да ўзнікнення новых дзяржаваў.
Адначасна працягваецца пошук "хороших русских" ва Ўкраіне, і гэта пры тым, што толькі праз сваю імперскую палітыку Расейская Федэрацыя можа захавацца, як сучасная турма народаў.
Таму для нас непрымальна, што ў якасці часткі расейскага "Добровольческого корпуса" выкарыстоўваюць пэўныя структуры беларускіх добраахвотнікаў, бо зусім не важна, пад якімі сцягамі - ліберальнымі, кадэцкімі ці нават нацысцкімі, - спрабуюць перабудаваць Расею.
РФ, як дзяржава, мусіць знікнуць, бо Масква плануе знішчэнне не толькі Ўкраіны, але і Беларусі, ды ўсіх іншых краінаў, якія мелі няшчасце ў сваёй гісторыі быць пад акупацыяй расейскіх царскіх ці камуністычных уладаў.
Якраз у інтарэсах імперскай Расеі ва Ўкраіне і адбываецца дыскрымінацыя беларусаў, праводзіцца антыбеларуская інфармацыйная кампанія. Гэтая кампанія мае сваім падмуркам, у тым ліку, мары украінскіх алігархаў атрымаць акцыі беларускіх прадпрыемстваў, якія робяць асноўны ўнёсак у дзяржаўны бюджэт. Практычна інфармацыйнае поле Ўкраіны не звяртае ўвагі на антыбеларускую палітыку нелегітымнага лукашэнкаўскага рэжыму, які ўжо тры гады праводзіць палітыку тэрору і масавых рэпрэсій супраць беларусаў, чым несвядома дапамагае здзяйсненню маскоўскіх планаў на поўнач ад сваёй мяжы, што пярэчыць украінскім нацыянальным інтарэсам.
Беларускі народ чакаюць цяжкія выпрабаванні, якія ён можа прайсці з меншымі ахвярамі, толькі абапіраючыся на ідэі Незалежніцтва, якія патрабуюць і абароны інтарэсаў і правоў грамадзянаў Рэспублікі Беларусь, што вымушаны былі масава ратавацца ў замежжы ад тэрора ў Беларусі.
Таму Рух Салідарнасці "Разам" чарговы раз падтрымлівае адкрыты ліст Старшыні Рады БНР Івонкі Сурвілы да прэзідэнта Ўкраіны Ўладзіміра Зяленскага ад 4 сакавіка 2022 года. Адсутнасць адказу ўладаў Украіны відавочна сведчыць пра немагчымасць фармавання там у сённяшніх умовах беларускага войска, неабходнасць якога разумее беларуская дыяспара.
Адначасна, Рух Салідарнасці "Разам" цалкам разумее і падтрымлівае беларускіх дабраахвотнікаў, якія змагаюцца і гінуць за Ўкраіну ў вайне са спрадвечным ворагам Беларускай Нацыі - расейскім імперыялізмам.
Беларусь - гэта не лукашэнкаўскія бандыты, якія захапілі ўладу ў краіне, а беларускі народ. Які паняволены, але яшчэ жывы, і працягвае чыніць супраціў расейскім імперыялістам, нават адрэзаны будуемым новым "жалезным занавесам" і гвалтоўна загнаны ў сталінскія часы.
Верым у Адраджэнне і Вызваленьне Беларусі, супрацоўнічаем і падтрымліваем ўсе сілы, якія змагаюцца супраць расейскага імперыялізму.
Свабоду Народам! Свабоду Асобе!
Жыве Беларусь!
Слава Украіне!
Слава Нацыі!
Сустаршыні Руха Салідарнасці "Разам"
Юрый Ляшэнка
Алесь Макаеў
Алена Талстая
25.09.2023 г.