ЧЫРВОНЫ БОР канал

Глядзім беларускі ютуб 🎦

Вітанкі, чырвонаборцы! ✋

Пару тыдняў таму з'явіўся новы сэрвіс - каталог беларускіх youtube каналаў brama.online.
Нам прыйшлося даспадобы, як ён працуе, таму горача яго прапануем!

Што вельмі зручна?
1. Вельмі проста адсочваць навінкі беларускага ютуба, у нейкім сэнсе сайт замяняе галоўную старонку youtube.
2. Фільтры для найсвяжэйшых відэа. Можна выбраць толькі беларускамоўныя відэа альбо тэму, якая вас цікавіць.
3. Сочым за новымі каналамі, якія з'яўляюцца ў каталозе, і дадаем, пра якія вы ведаеце.
4. Можна прааналізаваць гісторыю беларускага ютуба. Проста адкрыйце апошнюю старонку і паглядзіце, з чаго пачыналася беларуская медыяпрастора ў інтэрнэце. На дадзены момант наша гісторыя пачынаецца з 12.03.2007. Калі ведаеце іншыя старыя каналы, дадавайце, будзе цікава ведаць! Напішыце, калі вам будзе цікава пачытаць наш агляд на што-небудзь з гэтага каталога, — мы абавязкова зробім!
5. Для кожнага відэа генеруецца кароткі змест з дапамогай штучнага інтэлекту.

Чаго не хапае?
1. Пошуку. А было б файна, асабліва ўлічваючы наяўнасць кароткага зместу відэа, які таксама можна індэксаваць.
2. Каталога каналаў, а не відэа. Зараз можна бачыць толькі 5 новых каналаў, а было б цікава пакапацца ў поўным спісе.
3. Таймлайна для гісторыі відэа. Праглядаючы старыя відэа, з'явілася жаданне папераключацца паміж гадамі. Было б значна прасцей шукаць гістарычныя даты і падзеі ці, напрыклад, параўнаць святкаванне Новага года ў розныя гады, успомніць тое, што нас хвалявала кожны снежань за апошнія амаль 20 годоў.

У любым выпадку, ад імя ўсяго Чырвонага Бора мы выказваем шчырую падзяку аўтару партала, ён зрабіў вялікую і вельмі карысную працу. 👍

Спадзяёмся, вы таксама ацэніце новы сэрвіс. ❤️
Усім добрага беларускамоўнага аўторка ☺️

Добрага аўторка, даражэнькія суседзі!

Сёння мы будзем зноў размаўляць пра кіно. Беларускае незалежнае кіно, зробленае беларусамі, якое можна безкаштоўна паглядзець анлайн на сайце vodblisk.northernlightsff.com

VODBLISK - анлайн-кінатэатр, створаны камандай кінафестывалю «Пайночнае ззянне». Цяпер у анлайне можна глядзець беларускае сучаснае незалежнае кіно — і ігравыя, і дакументальныя стужкі.
У 2024 годзе VODBLISK бясплатны для карыстальнікаў з Беларусі.

Як глядзець?
1️⃣ Адкрываем старонку рэгістрацыі і ўводзім імя, пошту і пароль.
2️⃣ Адкрываем медыятэку і глядзім фільмы.

Што паглядзець?
На сайце ёсць фільмы, знятыя на розных мовах: беларускай, рускай, ангельскай, польскай і іншых. Але нават калі фільм на замежнай мове, то можна ўключыць субцітры.

Мы зрабілі шорт-ліст фільмай менавіта на беларускай мове, але прапануем звярнуць увагу і на іншыя, бо ўсе яны былі зроблены нашымі землякамі 🤗

📺 Возера радасці
Фільм, які трапіў у лонг ліст прэміі Оскар.
У маленькай беларускай вёсцы, дзе час быццам спыніўся, дзевяцігадовая Яся перажывае смерць маці. Бацька дзяўчынкі адпраўляе яе ў інтэрнат. Але аднойчы яна вырашае збегчы і вярнуцца дадому.

📽 Summa
Маладая беларуская мастачка стамілася ад руціны паўсядзённага жыцця. Марыя пакідае мужа ў Менску і зноў адпраўляецца ў Мачкова Руда ў Польшчы. Яна апынаецца ў казачным месцы сярод некранутых балот. Там стары польскі мастак Анджэй Струміла жыве ў адзіноце ў сваім маёнтку. З кожным днём іх сяброўства і сімпатыя растуць. Іх аб'ядноўваюць сумесная праца, шчырыя гутаркі і мастацтва. Так фармуецца моцная сувязь паміж імі. Гармонію парушаюць пастаянныя званкі ад мужа мастачкі, які патрабуе, каб яна вярнулася дадому.
Ідылія можа разваліцца ў імгненне вока..

🎬 Чыстае мастацтва
Маляры ЖЭСу Зіна і Іна старанна зафарбоўваюць на сценах Менску надпісы, пакідаючы пасля сябе рознакаляровыя квадраты. Натхнёны яркімі фігурамі мастак – абстракцыяніст Захар Кудзін, выходзіць на гарадскі пленэр. Зацікаўленыя мінакі, спрабуючы інтэрпрэтаваць творчасць Захара, выказваюць сваё меркаванне не толькі пра мастацтва. Назіраючы за нараджэннем арт-феномену, фільм з іроніяй і любоўю паказвае сучасную Беларусь і ўздымае пытанні, актуальныя не толькі для нашай краіны.

Прыемнага прасмотра!

Добрай раніцы, сябры!

Мы вяртаемся з традыцыйным паведамленнем у беларускамоўны аўторак! ❤️‍🔥

21-га лютага будзе міжнародны дзень роднай мовы. Як вы збіраецеся яго святкаваць? Магчыма гэта добрая нагода, каб паўдзельнічаць у нейкай культурніцкай падзеі? Неабавязкова ў гэты самы дзень, але ж падтрымаць беларускую культуру і паспрабаваць нешта новае. ❤️

Мы вырашылі пашукаць варыянты куды можна схадзіць.

1️⃣ Вельмі шырокі выбар у тэатры беларускай драматургіі (РТБД). Увесь люты тэатральныя пастановы на самы розны густ, але вольных квіткоў не так і шмат, на 21-га квіткоў наогул не засталося. Застаецца толькі прымяняць хітрыкі. Напрыклад, на kufar зараз ёсць тры квіткі на "Карней" 8-га лютага.

2️⃣ У тэатры юнага гледача 18-га лютага можна паглядзець "Добрай раніцы, Званочак!", 24-га лютага "Вясёлы Роджар", а 13-га сакавіка адбудзецца спектакль "Дзiкае паляванне караля Стаха".

І.... гэта ўсё! 😢 Нажаль, знайсці беларускамоўныя мерапрыемствы, нават на дзень роднай мовы, не так і проста. Напрыклад, на relax.by па фільтру "Дзень мовы" наогул нічога беларускамоўнага на люты няма! Можа яшчэ што-небудзь з'явіцца, таму прапануем адсочваць і дзяліцца спасылкамі на мерапрыемствы. Але 2 гады таму мы рабілі падобную падборку беларускамоўных спектакляў і выбар быў значны больш. Відавочна, што беларускай мовы ў Беларусі становіцца ўсё менш.

Можа мы што прапусцілі? Пішыце ў чацік!
Абдымаем вас, нашыя даражэнькія 🤗