Што новага ці забытага старога ў падручніках у БеларусіПаводле Ластоўскага, у школьных падручніках сёньня няма згадкі пра газэту «Мужыцкая праўда», якую выдавалі ўдзельнікі паўстаньня, нічога не гаворыцца пра «Лісты з-пад шыбеніцы» — лісты Каліноўскага, якія ён пісаў з турмы ў Вільні перад пакараньнем сьмерцю ў 1864 годзе. «Ня згадваюцца і спрэчкі аб статусе Літвы», — кажа гісторык.
«БНР у падручніках таксама апісваецца нэўтральна. У падручніку сказана, што рэалізаваць ідэі аб нацыянальнай свабодзе і дзяржаўнай самастойнасьці ў БНР не атрымалася. Што рэальнай дзяржавай БНР ня стала, паколькі цалкам падпарадкоўвалася нямецкай акупацыйнай адміністрацыі і дзейнічала ў рамках устаноўленых кампэтэнцыяў», — адзначыў Ластоўскі.
Неўтральнай, паводле яго, зьяўляецца ў падручніку і «ўстаўка пра зьяўленьне бел-чырвона-белага сьцяга».
Калі казаць пра гісторыю рэпрэсіяў у СССР, яны ў падручніку згадваюцца ў асобным разьдзеле, але там няма згадкі гісторыі Курапатаў, зьвярнуў увагу аўтар дасьледаваньня.
Ён таксама адзначыў «прынцыповую антыпольскасьць» у падручніку па гісторыі для 11 клясы.
Апісваючы становішча жыхароў заходнебеларускіх зямель у складзе Польшчы паміж Першай і Другой сусьветнымі войнамі, аўтары падручніка робяць акцэнт на «прымусовай паланізацыі насельніцтва, ваеннай дыктатуры, нацыянальным прыгнёце, паліцэйскім тэроры». «А польская „Армія Краёва“ [якая дзейнічала падпольна ў 1942–1945 гадах] прыраўноўваецца да гітлераўскіх карнікаў», — адзначыў Ластоўскі.
«Калі казаць пра Літву і стаўленьне да яе, дык пасьля 1996 году ВКЛ уяўлялася ў падручніках дзяржавай літоўскіх фэадалаў, стаўленьне было варожым, быццам літоўцы такія ж карнікі, як палякі. Калі казаць пра сёньня, дык у падручніках для 10 клясы і ў падручніку для 6 клясы пад рэдакцыяй Ігара Марзалюка (праўладны гісторык, дэпутар Палаты прдстаўнікоў — рэд.) ВКЛ — поліэтнічная дзяржава, створаная разам беларусамі і літоўцамі. І падкрэсьліваецца важная роля Навагрудка ў стварэньні ВКЛ, падкрэсьліваецца беларускі характар ВКЛ», — адзначыў сьпікер.
https://www.svaboda.org/a/33237862.html
