Аб’яднаны Пераходны Кабінет Беларусі

«Гэты жудасны напад патрабуе расследавання і пакарання як выканаўцаў, так і заказчыкаў»

Намеснік кіраўніцы Кабінета Павел Латушка – пра асобу і дзейнасць прафесара Яна Маліцкага, які пацярпеў у выніку нападу ў Варшаве:

«У перадсвяточныя дні мяне глыбока ўзрушыла і засмуціла навіна аб жорсткім нападзе, учыненым мінулай ноччу на Яна Маліцкага, – шматгадовага дырэктара Цэнтра ўсходнееўрапейскіх даследаванняў Варшаўскага ўніверсітэта, кіраўніка стыпендыяльнай праграмы імя Кастуся Каліноўскага, якая на працягу многіх гадоў дае беларускім студэнтам унікальную магчымасць атрымаць еўрапейскую адукацыю.

Ян Маліцкі – адзін з выбітных палякаў, які шмат гадоў працуе над умацаваннем сувязей паміж Польшчай і дэмакратычнай Беларуссю. Дзякуючы яго намаганням сотні маладых беларусаў атрымалі магчымасць не толькі вучыцца ў Еўропе, але і падрыхтавацца да актыўнай ролі ў будучым дэмакратычным развіцці сваёй краіны.

Гэты жудасны напад патрабуе найпільнейшай увагі, аб’ектыўнага расследавання і строгага пакарання як выканаўцаў, так і заказчыкаў.

Для мяне вялікі гонар быць знаёмым з Янам Маліцкім з 2020 года і падтрымліваць праект падрыхтоўкі будучых дыпламатаў для незалежнай і еўрапейскай Беларусі. Маю цвёрдую ўпэўненасць, што Ян Маліцкі – гэта не толькі выбітны навуковец і арганізатар, але і сапраўдны змагар, чыя постаць з’яўляецца прыкладам мужнасці і стойкасці. Яго асабістая гісторыя – гэта гісторыя ўпартай барацьбы за свабоду сваёй краіны. І я ўпэўнены, што яго настойлівасць і зараджальная энергія нададуць яму сілы як мага хутчэй адужаць, і разам мы зможам працягнуць нашу справу.

Зычу Яну Маліцкаму сіл, моцнага здароўя і як мага хутчэйшага выздараўлення».

@CabinetBelarus

«Барацьба за свабоду і адукацыю – гэта тое, чаго баяцца ворагі дэмакратыі»

Прадстаўніца па моладзевай палітыцы і студэнцтве Аб’яднанага Пераходнага Кабінета Маргарыта Ворыхава – пра напад на дырэктара праграмы імя Каліноўскага прафесара Яна Маліцкага:

«Я з вялікім болем даведалася пра гэты напад. Прафесар Ян Маліцкі столькі зрабіў для беларускай моладзі: для многіх з нас праграма Каліноўскага стала магчымасцю пачаць новае жыццё і працягваць сваю адукацыю, калі дома нас пазбавілі гэтага права.

Цяжка знайсці словы, каб выказаць, якая страшная і несправядлівая гэтая сітуацыя. Падумаць толькі, чалавек, які ўсё жыццё дапамагаў іншым, сам апынуўся ў небяспечным становішчы. Я ад усяго сэрца жадаю яму найхутчэйшага выздараўлення і сіл справіцца з гэтым выпрабаваннем.

Гэтая трагедыя закранае ўсіх нас, бо паказвае, што барацьба за свабоду і адукацыю – гэта тое, чаго баяцца ворагі дэмакратыі. Але я ўпэўненая, што дабрыня, якую прафесар Маліцкі аддаваў столькіх год, вернецца да яго і дасць сілы прайсці праз гэта. Мы ўсе з Вамі, прафесар!»

@CabinetBelarus

⚡У Варшаве напалі на дырэктара праграмы імя Каліноўскага Яна Маліцкага

В.а. прадстаўніка па нацыянальным адраджэнні Кабінета Павел Баркоўскі выказаўся з нагоды інцыдэнту:

«Ужо доўгія гады праграма Каліноўскага ёсць надзейным інструментам атрымання якаснай адукацыі для беларускіх студэнтаў і абітурыентаў, якія зазналі рэпрэсіі і палітычна матываваныя прысуды на радзіме. Само існаванне падобнай праграмы – гэта вялікі галаўны боль для спецслужбаў дыктатара.

Для будучай дэмакратычнай Беларусі тая справа, якая рэалізуецца сіламі праграмы, мае вялізарнае стратэгічнае значэнне, бо маладыя па-еўрапейску адукаваныя людзі з выразнай грамадзянскай пазіцыяй – гэта той актыў, які зможа адыграць прынцыповую ролю ў дэмакратычных пераўтварэннях нашай краіны.

Мы рашуча асуджаем напад на дырэктара Стыпендыяльнай праграмы імя Кастуся Каліноўскага прафесара Яна Маліцкага, з высокай доляй верагоднасці зроблены рукамі або прадстаўнікоў спецслужбаў, або іх памагатых.

Нашыя думкі з прафесарам Янам Маліцкім, якому мы зычым найхутчэйшай папраўкі.

Праграма Каліноўскага ахоплівае досыць вялікую катэгорыю беларускіх маладых інтэлектуалаў, і мы вельмі ўдзячныя Міністэрству замежных спраў Польшчы за яе сталую падтрымку і ўзаемадзеянне»

@CabinetBelarus

«Перамены ў Беларусі – непазбежныя»

У Музеі Вольнай Беларусі ў Варшаве адбылася прэзентацыя базавага дакумента «План транзіту ўлады»

Дакумент, распрацаваны Прадстаўніцтвам па транзіце ўлады Кабінета, уключае ў сябе розныя сцэнарыі транзіту ўлады і комплекс арганізацыйна-прававых мер пад кожны з іх. Падчас прэзентацыі разглядаўся адзін са сцэнарыяў, апісаных у дакуменце.

Таксама на мерапрыемстве абмяркоўваліся дзеянні па супрацьстаянні ўзмацненню расійскага ўплыву на Беларусь у рамках так званай Саюзнай дзяржавы.

Павел Латушка, намеснік кіраўніцы, прадстаўнік па транзіце ўлады Кабінета: «Гэтая дыскусія адбываецца ў кантэксце 25-годдзя з дня падпісання Дамовы аб стварэнні так званай Саюзнай дзяржавы – дакумента, які выкарыстоўваецца ў якасці механізма пагроз і рызык для беларускай дзяржаўнасці. Сёння мы глядзім на гэтую дамову не як на нейтральны юрыдычны дакумент, а як на сімвал стратэгічнай памылкі, якая паставіла Беларусь у залежнасць ад палітыкі Расіі.

Удзельнікам сустрэчы прадастаўленая магчымасць азнаёміцца з праектам ″Плана транзіту ўлады″.

Перамены ў Беларусі – непазбежныя. Нашая дыскусія мае на мэце не толькі абмеркаванне праблем, але і фармуляванне рэальных прапаноў і дзеянняў».

Арцём Брухан, намеснік прадстаўніка па транзіце ўлады Кабінета: «Асноўным інструментам для ўмацавання суверэнітэту можа стаць транзіт улады ў Беларусі, незалежна ад таго, які сцэнарый транзіту будзе рэалізаваны. Падрыхтоўка і гатоўнасць да такога моманту – адзін з прыярытэтных напрамкаў дзейнасці нашага прадстаўніцтва».

Удзел у прэзентацыі і экспертным абмеркаванні, акрамя Паўла Латушкі і Арцёма Брухана, прынялі кіраўнік апарату Кабінета Валерый Мацкевіч – у якасці мадэратара, прадстаўнік па міжнародным і еўрапейскім супрацоўніцтве Кабінета Уладзімір Астапенка, прадстаўніца па сацыяльнай палітыцы Кабінета Вольга Зазулінская, прадстаўнік па абароне і нацыянальнай бяспецы Кабінета Вадзім Кабанчук, намеснік прадстаўніка па транзіце ўлады Арцём Праскаловіч, дарадца Офіса Святланы Ціханоўскай Анатоль Лябедзька, спікерка Каардынацыйнай Рады Анжаліка Мельнікава, незалежныя эксперты і інш.

@CabinetBelarus

«Вывучэнне досведу – як пазітыўнага, так і негатыўнага – важны крок для распрацоўкі ўласнай палітыкі»

В.а. прадстаўніка па нацыянальным адраджэнні Кабінета Павел Баркоўскі пракаментаваў вынікі працы экспертнага форуму «Моўная палітыка ў Беларусі: Праектуючы будучыню»

«14 траўня 1995 года па ініцыятыве Лукашэнкі быў праведзены рэферэндум аб змяненні статусу дзяржаўнай мовы і сімволікі ў Рэспубліцы Беларусь. Нягледзячы на немагчымасць вынясення падобных пытанняў на рэспубліканскі рэферэндум паводле Канстытуцыі і істотныя парушэнні ў самой працэдуры правядзення рэферэндуму, па факце былі ўнесеныя змены ў закон аб статусе дзяржаўнай мовы, што спарадзіла сітуацыю афіцыйнага двухмоўя.

На практыцы вызначэнне расійскай і беларускай мовы ў якасці дзяржаўных прывяло да выцяснення нацыянальнай мовы з большасці сфер грамадскага ўжытку, катастрафічнага яе скарачэння ў галіне адукацыі і дыскрымінацыі.

Першы экспертны форум па моўнай палітыцы сабраў спецыялістаў як з краін замежжа, так і беларусаў, каб яны маглі паразважаць над вызначэннем контураў і канкрэтных крокаў па планаванні моўнай палітыкі ў Беларусі на перыяд дэмакратычнага транзіту.

Выдатныя спецыялісты з Уэльса, Ірландыі і Украіны падзяліліся досведам адраджэння нацыянальнай мовы ва ўмовах каланіяльнага ціску і разбурэння натуральных механізмаў моўнай перадачы. Вывучэнне такога досведу – як пазітыўнага, так і негатыўнага – важны крок для распрацоўкі ўласнай палітыкі ў гэтай сферы.

Падчас форуму адбыліся выступленні і дыскусіі з абмеркаваннем дзейнасці новага Інстытута беларускай мовы, сацыялагічных аспектаў стаўлення грамадства да пытання мовы і ідэнтычнасці, ужывання мовы ў медыя, адукацыі, развіцця моўных праектаў для беларускіх дыяспар. 

Форум – лагічны крок у межах Стратэгіі нацыянальнага адраджэння і развіцця Прадстаўніцтва на нацыянальным адраджэнні Аб’яднанага Пераходнага Кабінета. Эксперты разгледзелі пытанні магчымага пераходу ад дыскрымінацыйнай практыкі двухмоўя да адзінай дзяржаўнай беларускай мовы, планавання пераходнага перыяду ўвасаблення гэтай нормы, пазітыўных мер падтрымкі паспяховага пераходу і правак у дзяржаўны закон аб мове з улікам актуальных абставін».

@CabinetBelarus

Непрызнанне выбарамі фарсу, які арганізуе Лукашэнка, прыцягненне дыктатара і яго памагатых да адказнасці за лачынствы, падтрымка беларускага дэмакратычнага грамадства

– Ключавыя тэмы кансультацый, якія працягвае намеснік кіраўніцы Кабінета Павел Латушка з амбасадарамі краін ЕС

Апошнім часам адбыліся сустрэчы Паўла Латушкі з амбасадарам Швецыі ў Польшчы Андрэасам фон Бекератам, амбасадарам Славеніі ў Польшчы Баянам Пограйцам, амбасадарам Аўстрыі ў Польшчы Андрэасам Штадлерам.

Абмеркавалі наступныя тэмы:

▪️непрызнанне як выбараў таго фарсу, які арганізоўвае Лукашэнка;

▪️недапушчэнне аднаўлення суб’ектнасці Лукашэнкі, які цалкам страціў сваю легітымнасць і не мае права прадстаўляць Беларусь на міжнароднай арэне, у тым ліку і ў кантэксце перамоў па Украіне;

▪️важнасць прадстаўлення інтарэсаў дэмакратычнай большасці беларускага грамадства падчас магчымых перамоў па Украіне;

▪️пытанні прыцягнення да адказнасці Лукашэнкі і яго саўдзельнікаў у рамках інструментаў Міжнароднага крымінальнага суда;

▪️працяг палітыкі ціску на рэжым Лукашэнкі з мэтай прымусіць змяніць яго антыбеларускую палітыку.

Павел Латушка праінфармаваў амбасадараў краін ЕС аб ​​выніках «Дзён Беларусі» ў Бруселі, у тым ліку пасяджэння Кансультатыўнай групы «Беларусь – ЕС» і палітычнай канферэнцыі высокага ўзроўню ў Еўрапарламенце.

Намеснік кіраўніцы Кабінета заўважыў, што падобныя фарматы з’яўляюцца эфектыўным інструментам для ўзаемадзеяння дэмакратычнай супольнасці Беларусі і ЕС: «Правядзенне "Дзён Беларусі" ў Бруселі – важны сігнал падтрымкі беларускага дэмакратычнага грамадства. Гэта сведчанне падтрымкі барацьбы і імкнення беларусаў за будучыню без Лукашэнкі».

Па выніках сустрэч з амбасадарамі Павел Латушка адзначыў: «Ключавыя партнёры дэмакратычных сіл Беларусі – Еўрапейскі саюз – не мяняюць сваёй стратэгіі, накіраванай на падтрымку дэмакратычных сіл і дэмакратычнага беларускага грамадства, а таксама на працяг палітыкі ціску на рэжым Лукашэнкі».

@CabinetBelarus

Беларусь – у фокусе прыярытэтнай увагі Еўрапейскага саюза падчас старшынства ў ім Польшчы

Тэма Беларусі будзе адным з прыярытэтаў падчас старшынства Польшчы ў ЕС – адзначыла намесніца міністра замежных спраў Польшчы Хенрыка Масціцкая-Дэндыс на сустрэчы з намеснікам кіраўніцы Кабінета, кіраўніком НАУ Паўлам Латушкам.

З 1 студзеня 2025 года пачынаецца старшынства Польшчы ў Еўрапейскім саюзе. Прадстаўніца МЗС Польшчы адзначыла, што адным з галоўных прыярытэтаў падчас старшынства Польшчы ў ЕС будзе падтрымка дэмакратычных памкненняў беларусаў.

Адной з першых найважнейшых падзей падчас старшынства Польшчы ў ЕС стане і правядзенне ў пачатку лютага 2025 года па ініцыятыве міністра замежных спраў Польшчы Радаслава Сікорскага «Kościuszko Forum» – канферэнцыі высокага ўзроўню. Да ўдзелу ў мерапрыемстве плануецца запрасіць як кіраўнікоў шэрагу міністэрстваў замежных спраў еўрапейскіх краін, так і кіраўніцу і прадстаўнікоў Аб’яднанага Пераходнага Кабінета, Каардынацыйнай Рады, а таксама іншых прадстаўнікоў беларускай дэмакратычнай супольнасці.

Павел Латушка выказаў удзячнасць Польшчы як члену Еўрапейскага саюза за арганізацыю «Беларускага тыдня» ў Бруселі, які стаў важным сігналам падтрымкі для беларускай дэмакратычнай супольнасці, а таксама адзначыў важнасць 4-га пасяджэння кансультатыўнай групы «Беларусь – ЕС», якая з’яўляецца эфектыўным інструментам узаемадзеяння дэмакратычнай супольнасці Беларусі і ЕС.

Асобна Павел Латушка праінфармаваў намесніцу міністра замежных спраў аб павелічэнні рэпрэсій у Беларусі напярэдадні г.зв. выбараў. Павел Латушка і Хенрыка Масціцкая-Дэндыс пагадзіліся, што сёння няма ніякіх падстаў і ўмоў, каб назваць фарс, які арганізуе рэжым, дэмакратычнымі і празрыстымі выбарамі. Польшча будзе ўдзельнічаць у падрыхтоўцы агульнай пазіцыі Еўрапейскага саюза, якая, як плануецца, будзе агучана адразу пасля 26 студзеня 2025 года.

Падчас сустрэчы абмяркоўвалася тэма прыцягнення да адказнасці Лукашэнкі і яго саўдзельнікаў за здзейсненыя злачынствы супраць чалавечнасці ў адносінах да беларускага народа і ваенныя злачынствы супраць украінскага народа. Павел Латушка звярнуўся з просьбай падтрымаць зварот Урада Літвы ў Міжнародны крымінальны суд, а таксама прадставіў прававыя абгрунтаванні магчымага выкарыстання інструментаў МКС для прыцягнення Лукашэнкі да адказнасці. Хенрыка Масціцкая-Дэндыс адзначыла, што Польшча палітычна падтрымлівае дадзены крок. Асобна былі прадстаўлены магчымасці выкарыстання механізмаў АБСЕ на шляху дасягнення адказнасці для прадстаўнікоў рэжыму Лукашэнкі.

Пры ўдзеле дырэктаркі консульскага дэпартамента МЗС Польшчы Юстыны Хжаноўскай асобна былі абмеркаваныя візавыя пытанні і пытанні легалізацыі беларусаў у Польшчы, у тым ліку праблемныя пытанні выдачы віз на падставе запрашэнняў беларусаў, якія маюць міжнародную абарону ў Польшчы. Павел Латушка падзякаваў польскаму боку за падтрымку ў выдачы гуманітарных віз беларусам, якія вымушана пакідаюць краіну ў сувязі з пагрозай рэпрэсій.

@CabinetBelarus

У Варшаве пачаў працу экспертны форум «Моўная палітыка ў Беларусі: Праектуючы будучыню»

Адкрыў мерапрыемства в.а. прадстаўніка па нацыянальным адраджэнні Аб’яднанага Пераходнага Кабінета Павел Баркоўскі.

Падчас першай сесіі форуму, прысвечанай актуальнаму стану моўнага пытання ў Беларусі і гістарычным прыкладам моўнага адраджэння, з дакладамі выступаюць моўная актывістка Аліна Нагорная, прафесар універсітэта Кэмбрыджа і Кардыфа Колін Х. Уільямс, дырэктар офіса мультымоўнасці Дэпартамента замежных спраў Ірландскай рэспублікі Шон О'Рыян, каардынатар руху «Простір свободи» Тарас Шамайда і інш.

Да другой сесіі на тэму «Сацыялогія грамадскай думкі і фактары змены стаўлення да моўнага пытання ў грамадстве» ў якасці экспертаў далучацца акадэмічная дырэктарка Інстытута беларускай мовы Лілея Плыгаўка, выканаўчая дырэктарка Інстытута беларускай мовы Святлана Лясовіч, доктар сацыялагічных навук Андрэй Вардамацкі і інш.

@CabinetBelarus

«Іх дзяцінства аказалася больш складаным, чым павінна быць»

Прадстаўніца па сацыяльнай палітыцы Кабінета Вольга Зазулінская заклікае беларусаў і беларусак далучыцца да калядных збораў у падтрымку дзяцей, чые сем’і апынуліся ў цяжкай сітуацыі ў выніку рэпрэсій і вайны:

«Дзеці палітзняволеных і дзеці добраахвотнікаў – гэта проста дзеці. Яны чакаюць цуду, вераць у дабро і спадзяюцца на цеплыню, як і любое дзіця. Але іх дзяцінства аказалася больш складаным, чым павінна быць. Іх бацькі – героі, якія змагаліся за справядлівасць або адправіліся абараняць іншых. А дзеці засталіся чакаць. Яны чакаюць не толькі маці ці тату, але і простую чалавечую падтрымку.

Дапамагаючы гэтым дзецям, мы дорым ім веру ў дабро. Мы паказваем, што, нягледзячы на ​​ўсе складанасці, свет вакол усё яшчэ можа быць светлым, а людзі – добрымі. Гэта наш шанс стаць для іх часткай гэтага цуду, сагрэць іх душы, падарыць радасць, якой так не хапае.

Кожны ваш данат – гэта не проста дапамога, гэта ўсмешка дзіцяці, яго вера ў тое, што іх не забыліся. Падтрымайце арганізацыі, якія збіраюць сродкі для гэтых дзяцей. Напрыклад:

1️⃣ збор на падарункі дзецям палітзняволеных арганізаваў Фонд «Краіна для Жыцця»;

2️⃣ грашовыя падарункі для дзяцей, чые сем’і трапілі ў цяжкія абставіны, будуць зробленыя ў межах каляднай акцыі 2025 года «Падорым дзецям цуд!»;

3️⃣ падтрымаць дзяцей, чые бацькі загінулі на вайне, можна праз збор, арганізаваны Палком імя Каліноўскага, па спасылках PLN, USD, EUR.

Далучайцеся, кожнае ахвяраванне каштоўнае! Разам мы можам зрабіць свет крыху цяплейшым»

@CabinetBelarus

Ключавыя палітычныя і культурніцкія падзеі, у якіх узялі ўдзел чальцы Кабінета падчас Дзён Беларусі ў Бруселі

☑️ Намеснік кіраўніцы Кабінета Павел Латушка і прадстаўнік па міжнародным і еўрапейскім супрацоўніцтве Кабінета Уладзімір Астапенка мелі сустрэчу з амбасадарамі Еўрасаюза ў Камітэце па палітыцы і бяспецы Рады Еўрасаюза, падчас якой абмеркавалі пытанні адказнасці Лукашэнкі за злачынствы супраць беларусаў, неабходнасць жорсткай пазіцыі ЕС па ізаляцыі рэжыму, а таксама важнасць падтрымкі звароту Літвы ў МКС.

☑️ Кіраўніца, прадстаўнікі і прадстаўніцы Кабінета далучыліся да працы чацвёртага пасяджэння Кансультатыўнай групы «Беларусь – ЕС».

▫️Святлана Ціханоўская выказала спадзяванні, што з новым кіраўніцтвам ЕС супрацоўніцтва дэмакратычных сіл Беларусі з Еўропай не толькі працягнецца, але і стане яшчэ мацнейшым і ўплывовым.

▫️Прадстаўнік па транзіце ўлады Кабінета Павел Латушка падкрэсліў залежнасць рэжыму Лукашэнкі ад Расіі, адсутнасць умоў для дэмакратычных выбараў у Беларусі, неабходнасць падтрымкі беларускіх дэмакратычных сіл, санкцыйнага ціску на рэжым, а таксама ўзняў пытанні прыцягнення Лукашэнкі да адказнасці.

▫️Прадстаўніца па моладзевай палітыцы і студэнцтве Кабінета Маргарыта Ворыхава акцэнтавала ўвагу на неабходнасці падтрымкі адукацыі, стажыровак і стыпендый у Еўропе для беларускай моладзі, а таксама на падтрымцы беларускіх моладзевых арганізацый.

▫️Як адзначыў прадстаўнік па міжнародным і еўрапейскім супрацоўніцтве Кабінета Уладзімір Астапенка, па выніках працы Кансультатыўнай групы ўзгоднены меры для ўзмацнення ціску на рэжым Лукашэнкі, яго ізаляцыі і прыцягнення да адказнасці за злачынствы супраць беларускага народа. Акрамя таго, ЕС паабяцаў захаванне падтрымкі беларускай грамадзянскай супольнасці і развіццё шматгадовага фармату супрацоўніцтва.

☑️ Кіраўніца Кабінета Святлана Ціханоўская яе намеснік Павел Латушка ўзялі ўдзел у канферэнцыі высокага ўзроўню Еўрапарламента ў падтрымку народа Беларусі, падчас якой гаварылі ў тым ліку пра шляхі вызвалення палітвязняў, важнасці правядзення свабодных выбараў у Беларусі, пагрозу Лукашэнкі для Еўропы, неабходнасць цвёрдай санкцыйнай палітыкі, падтрымку дэмакратычных сіл і зварот у Міжнародны крымінальны суд.

Таксама кіраўніца Кабінета:

▪️на адкрыцці выставы #FramedInBelarus адзначыла, што культурная спадчына з’яўляецца ключавым элементам у барацьбе з дыктатурай;

▪️узяла ўдзел ў гала-імпрэзе вядомага выдання POLITICO Europe у якасці спікеркі: «Я веру ў дэмакратыю. Але патрэбна мець мужнасць скарыстаць усе сродкі, каб змагацца з дыктатарамі. І тут адказнасць ляжыць не толькі на палітыках, але і на прыватным сектары, на тэхналагічных кампаніях, якія павінны быць адзінымі, думаць нестандартна»;

▪️адкрыла выставу «Галасы з турмы: Мастацтва як супраціў» (у праекце прадстаўленыя малюнкі і лісты, якія раскрываюць гісторыі палітзняволеных Беларусі, іх супраціў і нязломнасць нават за кратамі);

▪️выступіла на адкрыцці выставы «Нязломныя», прысвечанай зняволеным праваабаронцам «Вясны». «Сёння тыя, хто знаходзяцца за кратамі, не могуць казаць за сябе. Давайце будзем іх галасамі», – заклікала Святлана Ціханоўская.

@CabinetBelarus