Беларуская музыка

Hramadstva — яшчэ адзін беларускі рок-альбом, які выйшаў сёння. Гурт Atesta па-райнейшаму можна называць маладым, хаця музыканты граюць разам ужо амаль 7 год. Ад пачатку гэта была музыка, якая ў першую чаргу выклікала эмоцыі дзякуючы сваёй непасрэднасці і шчыраму юнацкаму драйву, а галоўнай адметнасцю быў вакал Ульяны Паўловіч. Яскравы, аб’ёмны і харызматычны. Карані гэтай харызмы трэба шукаць у манеры Далорэс О’Рыордан, бо аналогіі ўзнікаюць адразу і пазбавіцца ад іх ужо немагчыма. Але гэта, як мінімум, цікавы ўзор для натхнення.

Альбом Hramadstva амаль цалкам трымаецца на падачы Паўловіч, і інструментальны складнік працы толькі зрэдку выходзіць на першы план. То бок гурт добра выкарыстоўвае свае моцныя бакі, але і знаходзіцца ў відавочнай залежнасці ад іх. Праблема толькі ў тым, што гэтыя хібы можна добра камуфляваць на ўзроўні сінглаў, а вось на лонгплэі яны ўсё роўна заўважныя.

На першы план тут выходзяць яскравы сінгл «Каляды», трып-хопавыя «Архідэі», выбуховы «11» і пяшчотныя «Дзьмухаўцы» — бадай, самыя ўдалыя нумары альбому. Але ёсць і відавочна слабыя месцы: тытульнае «Грамадства» гучыць як клаўстрафабічны дэма-запіс, наўпроставая «Дзюна» выглядае хіба не самым удалым пачаткам альбому.

Atesta працягвае намацваць сябе і гэты пошук працягваецца і на новым альбоме. Складана зразумець і сфармуляваць гурт, які трымаецца на персанальнай харызме. Hramadstva — даволі роўны і крэпкі запіс, за які пры жаданні можна зачапіцца і пакінуць некаторыя песні ў плэй-лісце. Але ёсць адчуванне, што амбіцыі Atesta мацнейшыя за такую характарыстыку.

https://www.youtube.com/playlist?list=OLAK5uy_n-cuos3wSGrNZKoGKNZUIfr3qcTdGlAHE

Гурт Biaz Nazvy заўсёды працаваў з даволі простымі і зразумелымі структурамі — гэта быў шчыры і наўпроставы ракешнік без прэтэнзій на звышарыгінальнасць і вынаходлівасць. Калі уважліва прааналізаваць дыскаграфію бярозаўскага калектыву, можна зразумець, што яго творчая эвалюцыя адбываецца хіба ў нюансах гучання і пэўных выканальніцкіх нюансах.

Альбом «20 Plus» працягвае гэтую традыцыю, але ўжо ў іншых дэкарацыях — і ў першую чаргу гаворка пра вымушаную эміграцыю і шматлікія побытавыя пытанні, у перапынках паміж якімі здараецца творчасць. І ў гэтым кантэксце тузін немудрагелістых песень гучыць як спроба фармуляваць беларускі рок-мэйнстрым.

У ім няма яскравых хайлайтаў і звышупэўненай харызмы. Цікавых небанальных тэкстаў і арыгінальнай мелодыкі. Наадварот, увесь гэты матэрыял даволі прадказальны — і ўважлівы слухач даволі лёгка можа праспяваць за Алесем Лютычам большасць музычных фраз. Але ў прадказальнасці і гэтай ненаўмыснай шчырасці таксама ёсць свая абаяльнасць: паспрабуйце паслухаць гэты альбом хаця б два разы і зразумееце, што так маглі б гучаць Foo Fighters, калі б нарадзіліся ў Брэсцкай вобласці. Добра гэта ці дрэнна, пытанне рытарычнае.

https://open.spotify.com/album/3ydBP8QxwYGVbZn7H3EC7F?si=M09sSgh_TcGadKPe5nr3kA

Паміж папярэднім лонгплэем Naviband і «Адлігай» шлях у доўгія пяць год. Не трэба пераказваць усё тое, што адбылося цягам гэтага часу: усе мы і так цудоўна ведаем падзеі, абставіны, кантэкст. З 4 снежня 2019 году (дата рэліза альбома Naviband) гурт пераўтварыўся ў адзін самых актыўных і паспяховых эмігранцкіх праектаў – настолькі, што ўжо другі год запар збіраюць варшаўскую Progresja.

І вось нарэшце гурт сфармуляваў і сфарміраваў новую праграму – канцэптуальны альбом «Адліга» з 16 трэкаў. Некаторыя мы з вамі ўжо чулі: пяшчотныя хіты «Мама» і «Лістапад» з далікатным гучаннем вяртаюць у мэйнстрым традыцыю лагоднай, шчырай беларускай песні з яскравай мелодыкай. Яны, нібы паштоўкі з дзяцінства, пераносяць слухача ў аналагавы ўтульны сусвет цёплага саўнда.

Скразны нумар «Адлігі» і галоўны мэсэдж альбома – разбітая на чатыры кавалкі песня «Загляне сонца». Яна і фарміруе кароткі змест сэнсавай часткі: цемра не назаўсёды, у нас ёсць надзея. Фактычна, «Адліга» – мудборд, у якім лірыка выконвае хутчэй функцыянальную ролю. Тэксты цудоўна спалучаюцца з музыкай фанетычна, але выходзяць на першы план зрэдку, калі ў песнях з’яўляецца канкрэтны лірычны герой.

На альбоме ёсць некалькі сапраўды шыкоўных песень. Тут можна вылучыць і хіты «Мама» і «Лістапад», пранізлівы лірычны сінгл «Прабач», цудоўную сваёй небанальнай аранжыроўкай «Стрэламі», атмасферную «Цёмную ваду». Але ў цэлым альбом вельмі роўны – гэта складанка з прыгожых лірычных кампазіцый, якая толькі ў канцы зрываецца ў танец пад назвай Life. А там, дзе музыкантам бракуе цікавых меладычных рашэнняў, песні пачынаюць гучаць і развівацца дзякуючы густоўным і дакладным аранжыроўкам Аляксандра Табольскага.

Цікава і вось што. На альбоме ёсць тры дуэты (Шура БИ-2, Palina, Mgzavrebi) і ў кожным з іх не хапае нейкай разынкі і адметнасці. Гэта роўныя, зразумелыя песні, якія добра кладуцца ў логіку альбома, але Арцём і Ксюша пачынаюць гучаць менавіта дуэтам – паміж імі цягам усяго альбома адбываецца сапраўдная хімія, і калі яны з’яўляюцца ў песнях паасобку, гэта нагадвае метафарычнае блуканне, пра якое шмат спяваецца на «Адлізе».

Naviband цяпер знаходзяцца ў цудоўнай студыйнай і канцэртнай форме. У Беларусі выпускаецца не так шмат падобнага гатунку музыкі: густоўнай, зразумелай, для ўсіх. І «Адліга» акурат падкрэслівае не толькі актуальнае гучанне гурта, але і яго сувязь з беларускай традыцыяй поп-музыкі. Хіба гэта не цудоўна?

https://band.link/NAVIBAND_adliga

Вітаю, сябры!

Сёння я прыйшоў да вас з навінамі і распавяду, што цікавага з’явілася ў нашым утульным Міністэрстве сепультуры.

А з’явіліся новыя прапановы для супорцераў канала —> https://buymeacoffee.com/charnukha/membership

Распавяду падрабязна пра кожную з іх.

💀Прыёмная (7 еўра на месяц)

Па гэтай падпісцы вы атрымаеце ранні доступ да выпускаў Міністэрства сепультуры, а яшчэ доступ да плэй-ліста з беларускай музыкай на Spotify, які будзе рэгулярна папаўняцца новымі песнямі.

💀Пінжак (15 еўра на месяц)

Гэта варыянт падпіскі для тых, хто хоча атрымліваць і штомесячны плэй-ліст з сусветнай музыкай, і мець доступ да плэй-лісту з беларускай музыкай. Бонусам — ранні доступ да выпускаў Міністэрства сепультуры.

💀Намеснік міністра (100 еўра на месяц)

Самы дарагі і эксклюзіўны варыянт падпіскі, але і прапанова вельмі цікавая. Намеснікі міністра атрымаюць доступ да штомесячных стрымаў з вядомымі беларускімі музыкантамі ў фармаце інтэрв’ю. Вы будзеце мець магчымасць задаваць свае пытанні ў чаце і быць актыўнымі ўдзельнікамі кожнага стрыма. Да таго ж, вы атрымаеце поўны пакет доступаў да іншых фарматаў: ранні доступ да новых відэа, доступ да плэй-ліста з новай музыкай, доступ да штомесячных плэй-лістоў з сусветнай музыкай і штомесячны эксклюзіўны матэрыял пра незвычайных музыкантаў.

Дзякуй вам за тое, што падтрымліваеце Міністэрства сепультуры. Без вас яго б папросту не існавала. Да таго ж, падтрымліваючы канал, вы даеце магчымасць гледачам унутры краіны глядзець новыя відэа. Гэта важна!

На наступным тыдні вас чакае новае відэа з дужа нечаканай гісторыяй. Да сустрэчы ў Міністэрстве!

Ваш міністр.